Son günlər şimal-qərb bölgəsində müşahidə olunan qeyri-sabit hava şəraiti Zaqatala rayonunda ciddi fəsadlara səbəb olub.

DogruXeber.tv xəbər verir ki, Baku TV-nin məlumatına görə, əsasən, Yuxarı Tala kəndi ərazisində çətinliklər yaranıb.

Talaçayda baş verən sel nəticəsində Meşleş kəndinə gedən avtomobil yolunun təxminən 800 metrlik hissəsi tamamilə yuyulub. Hazırda 36 təsərrüfatın yerləşdiyi kənddə avtomobillərin hərəkəti məhdudlaşıb. "Kəndə gedən yol dağılıb, gediş-gəliş kəsilib", - deyə sakinlərdən biri bildirib.

"Sel kənddə böyük problemlər yaradıb. Kəndin yuxarı tərəfində Meşleş kəndi yerləşir. Orada yaşayan insanlar ərzaq, su və avtomobil yolu ilə bağlı ciddi çətinliklərlə üzləşiblər. Yollar tamamilə bərbad vəziyyətdədir", - digər sakin deyib. Qeyd edək ki, sel rayonun digər yaşayış məntəqələrinə də ziyan vurub. Təsərrüfatlar və əkin sahələri su altında qalıb. Yolların bərpası və kəndlərlə nəqliyyat əlaqəsinin yenidən təmin olunması istiqamətində aidiyyəti qurumlar tərəfindən işlərin aparıldığı bildirilir.