Müdafiə naziri, general-polkovnik Zakir Həsənov Avropa İttifaqının Cənubi Qafqaz üzrə xüsusi nümayəndəsi Toivo Klaarın başçılıq etdiyi nümayəndə heyəti ilə görüşdə cəbhə xəttində iki silahlanmış ordunun daim üz-üzə dayandığını vurğulayaraq, müharibənin hər an başlaya biləcəyini istisna etməyib.

Nazir qeyd edib ki, beynəlxalq qurumlar Dağlıq Qarabağ münaqişəsinin fəsadlarının araşdırılması ilə deyil, onu yaradan səbəblərin köklü surətdə aradan qaldırılması ilə məşğul olmalı və münaqişənin bütövlükdə həllinə səy göstərməlidirlər.

Məsələ ilə bağlı Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Zahid Oruc Sonxeber.az-a açıqlamasında bildirib ki, ölkə başçısı İlham Əliyevin son çıxışlarında daha kəskin və hərbi bəyanatlar verməsi təsadüfi deyil. Dövlət başçısının hər bir addımı silahlı qüvvələrimiz tərəfindən daha da möhkəmləndirilir və əsaslı olduğu göstərilir. Digər tərəfdən qərb nümayəndələri qarşısında verilən mesajlar, Avropa Birliyinə daxil olan ölkələr maksimum dərəcədə çalışırlar ki, Cənubi Qafqazda hərbi toqquşmalar reallaşmasın. Bölgə Avropa məkanı ilə inteqrasiya olunub, iqtisadi cəhətdən əlaqələr qurulub. Onların transmilli şirkətləri bu regionda fəaliyyət göstərirlər. Bütün bunların taleyi qərbi narahat edir:
"Belə olan halda Azərbaycan tərəfinə qərbdən müəyyən basqılar və təsirlər edilir ki, Azərbaycan Ermənistanın əleyhinə tutduğu kəskin mövqeləri, Ryusiyadan alınan ağır silahların təmas xəttinə yaxınlaşdırılmasını, qoşunların üz-üzə dayandığı ərazilərdə son dəqiqə müasir silahları toplamasın. Qərbin kəşfiyyat mərkəzləri burada kifayət qədər çoxdur.

Millət vəkili vurğulayıb ki, Rusiyadan İrandan daha çox Avropanın ayrı-ayrı dövlətləri və onların təmsilçiləri Bakıya savaşın nə ilə nəticələnəcəyini çatdırmaq üçün o mesajları gətirir. Onlar Ermənistan tərəfindən çıxış etdiklərini hiss etdirirlər. Öz özlüyündə onların siyasi vəkillik mövqeyi görünür. Onlar Rusiyanın bütövlükdə bölgəyə sahib olacağından qorxurlar. Elə hesab edirlər ki, biz Putinin verdiyi toplarla qalib gəlsək, bu Moskva və Bakı arasında hərbi ittifaqın güclənəcəyindən narahatdırlar. Rusiya ilə Azərbaycan əlaqələrini daha da yaxınlaşdırar. Buna görə də qərb Qarabağ məsələsində Azərbaycana hərbi cəhətdən yardım etmək istəmirlər.