Lənkəranın H.Abdullayev küçəsinin yolları Pantanal bataqlığına oxşayır. Paraqvayla Boliviya arasında yerləşən dünyanın ən böyük bataqlığından seçilməyən sözügedən məhəllənin yolları yay-qış su içində, çala-çuxur, keçilməz, bərbad bir vəziyyətdədir.

İH nazirliyin üstünə atır

AzEuroNews.com-a danışan sakinlərin sözlərinə görə, onların yaşadıqları binalar hərbi şəhərcik yerləşir və Müdafiə Nazirliyinin balansındadır.

Lənkəran Şəhər İcra Hakimiyyəti isə yolların asfaltlanması məsuliyyətini üzərindən ataraq bu binaların nazirliyin balansında olduğunu söyləyir.

Belədə, dövlət qurumlarının arasında qalan sakinlərin nə yolları düzəlir, nə su ilə dolmuş, üfunət iyi verən binaların zirzəmiləri təmizlənir.

“Bu yolu özünüz görürsünüz. Nə uşaqların oynaması üçün şərait var, nə xeyir-şər düşəndə yol var. Müraciət eləmədiyimiz orqan qalmayıb.

İcra başçısına da şikayət eləmişik. İcra Hakimiyyətindən deyirlər ki, bizlik deyil, binalar Müdafiə Nazirliyinin balansındadır. Yaxşı, bəs biz hara gedək? Bizim də yaşamaq hüququmuz var”,-deyə şikayət edirlər.

Hərbi şəhərciyin həyətində 5 bina yerləşir. Bu binaların qarşısında keçilməli bir qarış asfalt qalmayıb. Sakinlər nazirliyə də müraciət ediblər ki, bəlkə köməklik göstərilə.

► Bu nə ayrı-seçkilik?

Di gəl ki, sakinlərin səsinə səs verən yoxdur. Sakinlər bildirirlər ki, bu ərazi Lənkəran şəhərinə məxsusdur, nazirlik özü ilə gətirməyib:

“İcra Hakimiyyətinə büdcədən vəsait ayrılır ki, şəhərin mərkəzi və ara yolları asfaltlansın. Ancaq bir maşın asfalt tökməyiblər ki, gediş-gəliş düzəlsin, uşaqlara topla oynaya bilsinlər, binalara sular dolmasın. Bəs həmin vəsaitlər hara sərf olunub?

Bəyəm o pulu ayıranda deyirlər ki, Lənkəranın hansı ərazisində 4-5 bina Müdafiə Nazirliyinin balansındadırsa, o camaatın yolunu düzəltməyin?

Biz də bu şəhərin sakinləyirik, yerli adamlarıq, vergi ödəyirik, kommunal ödənişlər edirik, seçkilərdə səs veririk. O halda bu nə ayrı-seçkilikdir?”

Sakinlər deyirlər ki, qabaqdan seçkilər gəlir, prezidentə səs verilməsinə çağırışlar olunur.

Onda Lənkəran ŞİH hakimiyyətin icraedici bir orqanı, bir qolu olaraq prezidentə dəstək üçün vətəndaşların sosial problemlərini həll etməlidir.

Qeyd edək ki, Hesablama Palatası 2013-2016-cı illərdə Lənkəranın daxili avtomobil yollarının əsaslı təmirinə, Lənkəran şəhərinin sosial-iqtisadi inkişafının sürətləndirilməsinə və yağan leysan yağışları nəticəsində dəymiş ziyanın aradan qaldırılması və çoxmənzilli binalarda təmir-bərpa işləri üzrə istifadə olunan ümumilikdə 61604,5 min manat vəsaitin auditini aparmışdı.

Və ciddi nöqsanlar aşkarlamışdı. 2015-ci ildə isə büdcədən yolların təmirinə 4 milyon manat ayrılıb.