Deputat Elmir Axundovanın biznesmen oğlu Həbib Axundovun zərərçəkmiş olduğu məhkəmə işi üzrə ifadələr verilib. “Qafqazinfo”nun verdiyi xəbərə görə, bu iş üzrə təqsirləndirilən Elnur İbrahimov özünü təqsirli bilməyib və H.Axundovla biznes münasibətlərinə aydınlıq gətirib.

O qeyd edib ki, xaricdən Azərbaycanda ofis ləvazimatları gətirib satmaqla məşğul olub. Bu iş üçün tanışlarından pul alıb və əvəzində onlara qazanc verib. Yekunda bu zəncirin bir ucu Həbib Axundova çıxıb, Axundov isə öz tanışları Fərman Məmmədov və Nazir Mirzəyevi də bu işə qoşub.

E.İbrahimov deyib ki, H.Axundovdan ilk olaraq 5 min alıb və elə həmin gün də 5500 qaytarıb: “Sonra 10 min alıb, 11 500, 25 min alıb 30 min, 90 min alıb 99 min qaytardım. Bundan sonra da həftəsinə 12 min qazanc vermək şərti ilə bir neçə dəfə 90 min aldım. Axırda işlər yaxşı getmədi, pulları qaytara bilmədim. Həbib pulları tələb etdi, hesabladıq 535 min borcum olduğunu dedi. Onun tanışları Orxan və Zarinadan aldığım pulları da Həbin ona verməyimi istədi, bunlarla birgə 735 min borcum oldu. Həbib məndən tələb etdi ki, bu məbləğdə borc müqaviləsinə qol çəkim. Mən isə onlara qazanc verdiyimi deyib güzəşt vermələrini istədim. Fərman 125 min qazanc götürdüyünü deyib 450 min borcum qaldığını bildirdi. Həbib də məcburən o pulu Fərmana ödədi”.

Zərərçəkmiş Fərman Məmmədov isə ifadəsində pulları Həbib Axundovdan tələb etdiyini deyib: “Həbib demişdi ki, gömrükdə müsadirə olunan malların satışını təşkil edəcəklər. Həm də anası Elmira Axundovanın parlamentin, məhkəmə sisteminin və digər dövlət qurumlarının dəftərxana ləvazimatları ilə bağlı tenderləri udduğunu söylədi. Həbib dedi ki, buna görə malı çatdıra bilmirlər və məndən borc pul istədi. İlk dəfə 10 min verib, 11 min aldım. Ümumi olaraq 435 min pul verdim. Amma həmin pulların Elnura verildiyindən xəbərim olmayıb. 2013-cü ildə pulumu istəyəndə Həbib dedi ki, Elnur ələ keçirib.

Həmin gün Həbib zəng edib dedi ki, uşaqlar Elnuru tutub Şüvəlandakı bağ evlərinə aparıblar. Mənim də ora gəlməyimi istədi. Orada Elnur pul aldığını etiraf etdi, bir gün sonra Elmira Axundova mənə zəng edib digər şəxslərlə də razılığa gəldiklərini dedi. 20 gün sonra Həbib məni evlərinə çağırdı, Elmira Axundova orada mənə 200 min verdi. Qalan pulu da yaxın günlərdə verəcəyini bildirdi. Bir dəfə də Elmira Axunova məni çağırıb 50 min verdi, daha sonra Həbib qalan 200 mini qaytarmaqdan imtina etdi. Mən indi həmin pulu Həbib Axundovdan tələb edirəm”.

Həbib Axundov isə ifadəsində Elnur İbrahimovun “piramida” quraraq onu və digər şəxsləri aldatdığını deyib: “Fərman Məmmədovdan alınan pula görə zamin durmuşdum, sonra məcburən bankdan 200 min kredit götürüb Fərmana verdim. Sonra da 50 min verdim. Özüm də iş görmək üçün Elnura pul vermişdim”.

Qeyd edək ki, hazırda bu iş üzrə Bakı Ağır Cinayətlər Məhkəməsində proses davam edir, Elnur İbrahimov həbs edilib, Həbib Axundov isə zərərçəkmiş kimi tanınıb.

Murad Əhməd