Bu gün Azərbaycan yığması UEFA Millətlər Liqasında növbəti oyununu keçirəcək. D Liqasının 3-cü qrupunda yer alan Qurban Qurbanovun rəhbərlik etdiyi kollektiv IV tur çərçivəsində Malta yığmasını qəbul edəcək.

Qeyd edək ki, Bakı Olimpiya Stadionunda keçiriləcək oyun yerli vaxtla saat 20:00-da başlayacaq və “CBC Sport” telekanalı vasitəsilə canlı yayımlanacaq.

Ötən ay bu komandalar arasında II turun Ta Qali Milli Stadionunda keçirilmiş görüşü heç-heçə ilə nəticələnib - 1:1. Hesabı 10-cu dəqiqədə meydan sahiblərinin futbolçusu Andrey Acus açıb. O, Bədavi Hüseynovun cərimə meydançası daxilində yol verdiyi qayda pozuntusundan sonra təyin edilən penaltini dəqiq yerinə yetirib. Azərbaycan millisi isə bərabərlik qolunu 26-cı dəqiqədə rəqib qapısından keçirib. Riçard Almeydanın vurduğu cərimə zərbəsindən sonra rəqib qapıçı topu qaytarsa da, Təmkin Xəlilzadə təkrar zərbə ilə fərqlənib.

Malta hələlik yalnız Azərbaycan millisindən xal ala bilib. Qrupda keçirdiyi bütün oyunlarda qol vuran "cırtdanlar", ilk turda Farer adalarına, oktyabrın 11-də isə Kosovoya səfərdə eyni hesabla uduzub - 1:3.

İlk qələbəsini 3 gün öncə Farer adalarında 3 cavabsız qolla qazanan Azərbaycan isə I tur qarşılaşmasında Bakıda Kosovo ilə qolsuz bərabərə qalıb.

Q.Qurbanov sərəncamında olan bütün futbolçulardan istifadə edə bilər. Rəqib düşərgədə isə heyətlə bağlı əsas problem Kosovo ilə qarşılaşmada qırmızı vərəqə alan kapitan Maykl Mifsudun cəzalı duruma düşməsidir. Baş məşqçi Rey Farruciyanın 37 yaşlı forvardın yerinə hücumda Alfred Effionq və ya Jan-Pol Farruciyaya şans verəcəyi gözlənilir.

Baş məşqçi müdafiəçilər - zədəsini sağaldan Rayab Kamillerinin və cəzası başa çatan Jozef Zerafanın da xidmətindən yararlana biləcək.

Qeyd edək ki, qrupun digər oyununda Farer adaları Kosovonu qəbul edəcək. Üç turdan sonra Kosovonun 7, Azərbaycanın 5, Farer adalarının 3, Maltanın isə 1 xalı var.