Nəsimi Rayon İcra Hakimiyyətinin məmurları yenə qaş düzəldikləri yerdə vurub gözü çıxarıblar.3

3 dekabrda “Əllilllər günü” münasibəti ilə icra hakimiyyəti tərəfindən pay verilən paltarlar rişxəndlə qarşılaşıb.

dogruxeber.tv Mozalan.az istinadən xəbər verir ki, bu haqda Qarabağ veteranı Əhməd Rəhmanov öz “facebook” hesabında yazıb:

“Bakı şəhəri Nəsimi rayonu İcra Hakimiyyətinin rəhbərliyinə.
“Hörmətli “məmurlar. Mən bir valideyn kimi sizə “öz minnətdarlığımı” bildirmək istəyirəm ki, dünən 3 dekabr əlillər günü münasibəti ilə 268 saylı xüsusi məktəbin 5-ci sinif şagirdi olan oğluma 52 razmer mayka hədiyyə etmisiniz. Düzdü, bu mayka hətta mənə də böyük olsa da, əlilliyi olan uşaqlara göstərdiyiniz bu nəvazişi görəndə ailəliklə sevincdən gözümüz yaşardı. Çünkü bizim heç ağlımıza belə gəlməzdi ki, Siz cənab məmurlar bu uşaqların naminə kiloqramla satılan geyimləri almaq üçün öz qızıl vaxtınızı ayırıb Səbərək bazarına gedəsiniz. Azərbaycanda dövlətin əlil uşaqlara verdiyi muavinatlar yaşayış minimumundan 2 dəfə aşağı, əlilə qulluq edən valideyn isə ümumən dustaq yerinə qoyulub, muavinat almır, amma əsas bu deyil . Əsas Sizin bu əlil uşaqlara əyinlərinə olmayan mayka kimi böyük ölçüdə ayrılıb, amma uşaqlara çatmayan məbləğlərdi ki, onu da yaqin hər bayramda əlillərin sağlığına həzm eləməyinizdir. Allah sizlərə dəyməsin, çünki, Allah dağına baxıb qarını verdiyi kimi, bizə baxıb Sizi verib .”