Kənd Təsərrüfatı Nazirliyi daha bir maraqlı yeniliyə başlayıb.
DoğruXəbər.az xəbər verir ki, 9659 fermerin torpaq sənədləri və payızlıq əkin barədə verdiyi məlumatlar ilk dəfə olaraq peyk vasitəsilə kosmosdan yoxanılıb.

Eləcə də bax: Fermerlərin məlumatları - KOSMOSDAN YOXLANILIR - YENİLİK
Nazirlikdən FED.az-a verilən məlumata görə, Elektron Kənd Təsərrüfatı İnformasiya Sistemində (EKTİS) payızlıq əkinlərə dair bəyan edilmiş məlumatların peyk vasitəsilə yoxlamaları davam edir. Peyk yoxlamaları zamanı Kənd Təsərrüfatı Nazirliyinin Coğrafi Məlumatlar Bazasına daxil edilmiş ortofotolar, müxtəlif vektorizasiya məlumatları, “Azərkosmos”dan alınmış peyk şəkilləri, layihələrin nəticələri, məsafədən zondlama üsullarından istifadə edilir.

Artıq ölkə üzrə 10 rayonda “Azərkosmos” dan çəkilmiş şəkillər əsasında yoxlamalar başa çatıb. Yoxlamalar hər rayonda təsadüfi yolla seçilmiş 3 kənd üzrə aparılıb. Zərdab, Samux, Ağsu, Siyəzən rayonlarından sonra

Ağcabədi (Avşar, Gəlabədin, Hacıbədəlli kəndləri),

Balakən (Katex, Şərif, Qazma),

Beyləqan (Kəbirli, Dünyamalılar, Təzəkənd),

Göygöl (Mollacəlilli, Yeni Zod, Quşqara),

Oğuz (Böyük Söyüdlü, Padar, Bucaq)

və

Sabirabad (Axısxa, Qəzli, Bulduq) rayonlarında torpaq sahəsi və əkin bəyanları barədə məlumatların peyk vasitəsilə kameral yoxlaması başa çatıb.

Peyk çəkilişləri заманы 10 rayon üzrə 9659 fermerin torpaq sənədləri və payızlıq əkinlə bağlı bəyan etdiyi məlumatlar yoxlanılıb. Yoxlamalar zamanı uyğunsuzluq şübhəsi doğuran sənədlərə dair bildirişlər göndəriləcək və həmin ərazilərdə yerində yoxlamalar aparılacaq. Yoxlamalar başa çatdıqdan sonra fermerin EKTİS-ə daxil etdiyi elektron bəyannamələr yekun olaraq təsdiqlənəcək və fermerə ödəniləcək məbləğ müəyyən ediləcək.

Qeyd edək ki, EKTİS-də bəyan edilmiş torpaq məlumatlarına (torpağın sənədi, əkin aparılan sahə və s.) və payızlıq əkin növünə (arpa, buğda, yonca və s.) dair bəyannamənin düzgünlüyünə fermer məsuliyyət daşıyır. Bu səbəbdən fermerlərə bəyan etdiyi məlumatlarda səhvlər varsa, düzəliş etmək üçün Dövlət Aqrar İnkişaf Mərkəzlərinə müraciət etmək tövsiyə olunur.

Yanvarın 22-dək 260 min fermerin şəxsi kabinetində əkin subsidiyası ilə bağlı elektron ərizə formalaşdırılıb. Fermerlər 3 gün ərzində şəxsi kabinetlərinə daxil olaraq elektron ərziə formasını təsdiq etməli və ya müvafiq düzəlişlərin edilməsi üçün DAİM-ə yaxınlaşmalıdırlar. Etiraz edilməyən ərizələr avtomatlaşdırılmış qaydada monitorinqə yönləndirilir.
FED.az