dogruxeber.tv: - Qazaxıstanda idxal koronavirus vaksinləri 2020-ci ildən etibarən ödənişli olacaq.

Bunu ölkənin səhiyyə naziri Aleksey Tsoy jurnalistlərə açıqlamasında deyib.

O bildirib ki, gələn ildən yerli vaksin olan “QazVak” və ölkədə istehsal olunan “Sputnik V” pulsuz vurulacaq:

“Qazaxıstanda kliniki sınaqlardan keçmiş və təsiri sübut olunmuş yerli vaksinimizi istehsal edə bildiyimiz üçün sözügedən peyvəndi pulsuz təmin etmək mümkündür. Digər vaksinlərin isə bazarda dövriyyəsi təmin ediləcək”.

Qazaxıstanda “QazVak” və ölkədə istehsal olunan “Sputnik V” vaksini ilə yanaşı, Ümumdünya Səhiyyə Təşkilatının təsdiqlədiyi “Sinopharm”, “CoronaVac” və “Hayat-Vax” istifadə olunur. Gələn ay isə ölkəyə “Pfizer” tədarükü gözlənilir.

Peyvəndin pullu olacağı gözlənilən daha bir ölkə Polşadır.

Polşa hökumətin mətbuat katibi Piotr Müller bu barədə sentyabr ayında açıqlama verib. O bildirib ki, peyvəndlərin bu ilin sonunadək ödənişli olacağı istisna edilmir:

“Biz peyvəndlərin bəlli mərhələdən sonra ödənişli olması barədə düşünmüşük. Lakin hal-hazırda peyvəndlər elan olunduğu kimi pulsuz olaraq qalacaq”.

İyulda isə qonşu Türkiyədə vaksinin pullu ola biləcəyi açıqlanmış, fəqət bu ictimaiyyətdə qəzəb doğurduğu üçün xəbərlər təkzib edilmişdi.
Hazırda dünya ölkələrinin əksəriyyətində koronavirusa qarşı peyvənd pulsuz şəkildə aparılır. Lakin artıq bəzi ölkələrin peyvəndlə bağlı verdiyi bu açıqlamalar ölkəmizdə də vaksinin pullu olub-olmayacağı ilə bağlı suallar yaradıb.

Maraqlıdır ki, ölkəmizdə COVID-19-a qarşı peyvəndin pullu olacağı gözlənilirmi?

Məsələ ilə bağlı Cebhe.info-ya açıqlamasında Milli Məclisin Səhiyyə komitəsinin üzvü, deputat Müşfiq Məmmədli deyib ki, ölkəmizdə kifayət qədər vaksin təchizatı var və pullu olacağı gözlənilmir:

"Azərbaycanda vaksinin pullu olacağı gözlənilmir. Çünki Azərbaycan sosial dövlət modelinə malik ölkədir. Sosial dövlət kimi də öz vətəndaşının vaksinasiyasını dövlət hesabına, pulsuz şəkildə edir. Bilirik ki, birinci və ikinci doza peyvənd pulsuz oldu, üçüncü doza da pulsuz tətbiq ediləcək. Ölkə rəhbəri tərəfindən vaxtında atılmış strateji addımlar və düzgün planlama nəticəsində vaksin təchizatında problem yoxdur. O cümlədən, infrastruktur və loqistika baxımdan da peyvəndlərin icrasında heç bir problem yaşanmır. Buna görə də vaksinin pullu olacağı Azərbaycan üçün keçərli deyil".

İnfeksionist Mərdan Əliyev deyib ki, yaxın gələcəkdə vaksinasiya pullu olacaq:

"Yaxın gələcəkdə vaksinin pullu olcağı gözləniləndir. Belə bir vəziyyətdə vaksin həmişə pulsuz olmayacaq. Koronavirusa yoluxma azaldıqdan sonra artıq peyvəndlər üçün ödəniş ediləcək. Kim könüllü şəkildə vaksin olunmaq istəsə pul ödəyəcək. Pandemiyanın tamamilə bitməsi gözlənilmir. Sadəcə olaraq, koronavirusa yoluxma halı da qrip şəkilini alacaq. Payızda yoluxama artacaq, yazda azalacaq. Bu zaman kim yoluxmaq istəmirsə, təbii ki, pulunu verib peyvənd vurdura bilər. Hər halda gələcəkdə belə olacaq".//dia.az