"Ermənistan öz məğlubiyyətini və öz xalqını aldatdığını gizlətmək üçün sosial şəbəkələrdə məhdudiyyət qoya bilər. Ermənistanın qoyduğu məhdudiyyət peşəkar fəaliyyətin bir parçası kimi qiymətləndirilə bilməz".

Bunu Sonxeber.az-a IT üzrə mütəxəssis Bəhruz Əliyev deyib.

"Peşəkar fəaliyyətin necə olduğunu Müzəffər Ali Baş Komandanımızın rəhbərliyi altında, Azərbaycan 44 günlük Vətən müharibəsində çox aydın formada göstərdi. Ordumuz innovativ texnologiyalardan istifadə edərək, dünyada aparılan döyüş üslublarına yeni müasir səviyyə qazandırdı. Bir çox inkişaf etmiş ölkə bizi heyrətlə izlədi, bu qürürverici idi. Ona görə də ölkəmizdə İT texnologiyların məqsədyönlü inkişafında hər birimiz maraqlı olmalıyıq və yenilikləri mənimsəməliyik. Milli avadanlıq və proqram təminatlarının yaradılmasında yüksək səylər göstərilməli və başda əlaqədar qurumlardan hər bir fərdə qədər təşəbbüs daha da genişlənməlidir.

İlk öncə vətəndaşlarımız çox ayıq olmalı və heç bir halda hər hansı hərbi-təhlükəsizlik və bənzər məsələlərinə aid video və şəkil çəkib paylaşmamalıdır. Video və şəkil çəkdikdə bu faylların içinə əməliyyat sistemi tərəfindən ümumi adla "metadata" adlandırılan məlumatlar yerləşdirilir. Bu Metadatada GPS koordinaltlardan tutmuş telefon modelinə qədər hətta telefonun digər parametrlərinə qədər tapmaq mümkündür. Çəkilən media faylları paylaşıldıqda düşmən əlinə keçərsə, həmin koordinatlara hücüm edilə bilər və ya bilmədən düşmənə kəşfiyyat məlumatları ötürülmüş ola bilər. Ölkəmizdə sosial şəbəkələrin bağlanması sadəcə peşəkar yanaşmanın bir nəticəsi olaraq, məsul qurumlar tərəfindən zəruriyyət yaranarsa, texniki olaraq mümkündür. Bu da düşünürəm ki, yuxarıda qeyd edilən məsələlərə sosial şəbəkə istifadəçilərimizin həssas yanaşmasından asılıdır. Əgər təhdid varsa, təbii ki bağlanması labüddur. Arxa cəbhədə olan hamımız informasiya müharibəsinin bilərək və ya bilməyərək içində olduğumuzu unutmamalı, eyforiyaya qapılmamalı və diqqətli olmalıyıq. Bu məsələlərdə diqqətsizlik həm mənəvi, həm də hüquqi məsuliyyət tələb edir".