dogruxeber.tv: - “Azərbaycan və Norveç digər Avropa ölkənlərinə enerji böhranından çıxmağa kömək edəcəklər”.

Bu barədə jurnalistlərə Avropa İttifaqına sədrlik edən Çex Respublikasının Baş naziri Petr Fiala məlumat verib.

O qeyd edib ki, hər bir Avropa ölkəsinin üzləşdiyi ən böyük problemlərindən biri enerji qiymətləridir:

“Biz Rusiyanın etdiyi kimi enerji sektorunda bizi şantaj edə biləcək dövlətlərdən asılılıqdan qurtulmalıyıq, enerji xammalının alınması mənbələrini şaxələndirməliyik. Burada, biz Norveç və Azərbaycan kimi ölkələrdən zəmanət almışıq ki, onlar Avropa İttifaqı ilə əməkdaşlığa və bizə kömək etməyə hazırdırlar. Bu son dərəcə vacibdir”.

Qeyd edək ki, son vaxtlar enerji böhranı ilə üzləşən Avropa, bu imkanlara malik ölkələrlə əlaqə qurmağa çalışır. Hazırda Avropanın enerji probleminin həllinə öz töhfəsini verəcək ölkələrdən biri də məhz Azərbaycan hesab edilir.

Maraqlıdır, Azərbaycanın belə bir imkanı varmı?

İqtisadçı-ekspert Fuad İbrahimov Cebhe.info-ya bildirdi ki, Azərbaycan Avropaya enerji böhranından çıxmağa kömək edəcək:

“Ancaq bu köməkdə xüsusi çəkimiz kifayət qədər deyil. Birbaşa Azərbaycanın enerji varlığının Avropa məkanına nəql olunmasından gedirsə, burada bizim neft əmsalını kənara çıxsaq, təbii qazın enerji təhlükəsiziyində payı yuvarlaq olaraq 2 faiz, maksimal isə kommunikasiyalar vasitəsilə, yəni TAP-ın mövcud vəziyyətinin gücləndirilməsi ilə 4 faizə çatdırılması mümkündür.

Ancaq ümumilikdə Avropanın məkanı üçün bu kifayət eləmir. Bir məqamı nəzərə almaq lazımdır ki, artıq siyasi və perspektiv nöqteyi-nəzərdən, bu kommunikasiyanın olması, söhbət TANAP və TAP-dan gedir, gələcəkdə şaxələnməsinə imkan var. Yəni mövcud kəmər, xətt, ərazi, dəhliz var. Qalır bunu şaxələndirərək təbii enerji sərvətləri zəngin olan ölkələrin bu dəhlizə daxil olması, məcazi mənada, Azərbaycanın Avropanın enerji təhlükəsizliyində mövqeyi və payı artmış olur.

Çünki müəllifi bizik, məhz Azərbaycan bu layihəni həyata keçirir. Sadəcə, şaxələnməklə, məsələn, Türkmənistan, sanksiyalar götürülərsə İran qazını Qərbə nəql etməklə Azərbaycan enerji təhlükəsizliyində payı artmış olacaq”.