"dogruxeber.tv" İrna-ya istinadən xəbər verir ki, ötən gün İran xarici işlər nazirinin baş köməkçisi Əli Əsgər Xaci bu dəfə də diqqət mərkəzində olan Suriya münaqişəsi üzrə Astana danışıqlarının son raundu çərçivəsində Türkiyə, Suriya və Rusiya xarici işlər nazirlərinin müavinləri ilə ayrıca görüşüb.

Türkiyə, Rusiya və İran xarici işlər nazirlərinin müavinləri qarant dövlət kimi Qazaxıstanın eyniadlı şəhərində çərşənbə axşamı səhər Suriya münaqişəsinin həlli yollarını müzakirə etmək üçün Astana danışıqlarının 20-ci raundu üçün bir araya gəliblər.

Bu gün də davam edəcəyi gözlənilən danışıqlarda Suriya prezidenti Bəşər Əsəd hökumətinin və ona müxalif silahlı qrupların nümayəndələri də iştirak edir.

Dördtərəfli görüş çərçivəsində Xacinin başçılıq etdiyi İran nümayəndə heyəti Türkiyə xarici işlər nazirinin müavini Burak Akçaparın başçılıq etdiyi nümayəndə heyəti ilə Suriya və Türkiyə arasında son hadisələrlə bağlı fikir mübadiləsi aparıb.

Onlar razılaşıblar ki, Ankara və Dəməşq münasibətləri normallaşana qədər danışıqlar davam etdirilməlidir. Hər iki tərəf həmçinin Suriyanın milli suverenliyinə, ərazi bütövlüyünə və müstəqilliyinə hörmətin vacibliyini vurğulayıb.

İran nümayəndə heyəti Suriya xarici işlər nazirinin müavini Ayman Susanın başçılıq etdiyi nümayəndə heyəti ilə də müzakirələr aparıb.

Ayrılıqda Xaci və onu müşayiət edən nümayəndə heyəti Rusiya xarici işlər nazirinin müavini Mixail Boqdanovun başçılıq etdiyi nümayəndə heyəti ilə də görüşüb. Tərəflər bölgədəki son hadisələri və Dəməşq ilə Ankara arasındakı fikir ayrılıqlarının aradan qaldırılması yollarını müzakirə ediblər.

İran və Rusiya nümayəndələri həmçinin Suriyanın suverenliyinə hörmət və terrorla mübarizənin vacibliyini vurğulayıblar.

dogruxeber.tv
Rəna Gözəlova