Rusiya Prezidentinin mətbuat katibi Dmitri Peskov deyib ki, Azərbaycan və Ermənistan arasında sülh müqaviləsinin bağlanması Moskva üçün çox vacibdir.

"dogruxeber.tv" Report-a istinadən xəbər verir ki, Peskov Ermənistanla Azərbaycan arasında sülh müqaviləsinin bağlanmasının Qafqazda sülhü və proqnozlaşdırıla bilən mühiti təmin edəcəyini vurğulayıb:

"Rusiya tərəflərə sülh müqaviləsinin bağlanmasında kömək etməyə hazırdır. Azərbaycan və Ermənistan bu yaxınlarda bir neçə dəfə sülh müqaviləsi üzərində işi başa çatdırmağa hazır olduqlarını bəyan ediblər”.

Politoloq Samir Hümbətov Demokrat.az-a açıqlamasında Peskovun fikirlərinə münasibət bildirib.

O, Azərbaycanla Ermənistan arasında sülh sazişinin imzalanmasının məhz Rusiyanın vasitəçiliyi ilə baş tutacağını hesab etmir:

“Müqavilənin imzalanmasında Qərb də maraqlıdır. Həm Rusiya, həm də Qərb açıq şəkildə müqavilənin yalnız hər birinin öz iştirakı ilə bağlana biləcəyinin mümkünlüyünü bildirir. Amma hesab edirəm ki, sülh müqaviləsinin bağlanması üçün ən doğru variant bunun ya sərhəddə reallaşması, ya da Gürcüstanda olmasıdır.

Üçüncü tərəflər də müqavilənin imzalanmasında iştirak edə bilər, amma daha doğru variant qeyd etdiklərimdir. Belə olduğu halda hər hansı vasitəçi olmadan, yəni hər hansı dövlətin dominantlıq hüququ formalaşmadan yalnız iki tərəf öz iradəsini ortaya qoyacaq. Bunun daha çox faydası və səmərəli nəticəsi ola bilər, nəinki digər güclərin iştirakı ilə bağlanması.

Təbii ki, Rusiya da, Avropa İttifaqı da, ABŞ də öz maraqlarına uyğun müqavilə imzalanmasını istəyir. Lakin önəmli olan Azərbaycanın maraqlarının təmin olunmasıdır. Azərbaycan qalib tərəfdir, amma Ermənistana müxtəlif formada təzyiqlər edilə bilər. Ona görə də sülh müqaviləsinin dövlət sərhədində və ya Gürcüstanda imzalanması variantları nəzərdən keçirilməlidir”.