"Abzas Media"-nın həbsdə olan baş redaktoru Sevinc Vaqifqızı (Abbasova) saxlandığı 1 saylı Bakı İstintaq Təcridxanasındakı şəraitdən narazıdır.

"dogruxeber.tv" bildirir ki, bu barədə vəkil Elçin Sadıqov məlumat verib.

E.Sadıqov qeyd edib ki, jurnalistin sözlərinə görə, saxlanıldığı kamerada vəziyyət acınacaqlıdır: "İstilik demək olar ki, yoxdur. Çünki kameradakı istilik sistemi partlayıb, kamera suyun içərisindədir".

Vəkil bildirib ki, martın 19-da Bakı Apelyasiya Məhkəməsinin hakimi Elmar Rəhimovun sədrliyi ilə Sevinc Vaqifqızının barəsində həbs qətimkan tədbirinin uzadılması ilə bağlı Xətai Rayon Məhkəməsinin qərarından apellyasiya şikayətinə baxıldı. Şikayət təmin olunmadı.

S.Vaqifqızı 2023-cü ilin noyabrın 21-də həbs olunub. Ona qarşı Cinayət Məcəlləsinin 206.3.2-ci maddəsi ilə ittiham irəli sürülüb. O, ittihamları qəbul etmir və həbsini jurnalistika fəaliyyəti ilə əlaqələndirir.

Hüquq müdafiəçilər S.Vaqifqızını siyasi məhbus kimi tanıyıb. Azərbaycan rəsmiləri isə ölkədə siyasi səbəblərlə heç kim həbs olunmadığını bildirir.//turan.az