Bu gün Azərbaycanda 700-ə yaxın ixtioz xəstəsi var.

"dogruxeber.tv" xəbər verir ki, bunu Milli Məclisdə “Sağlam ailə modeli və nikah hüququ” mövzusunda keçirilən ictimai dinləmədə Səhiyyə Nazirliyi Səhiyyə siyasəti şöbəsinin Ana və uşaqların sağlamlığının qorunması sektorunun müdiri Aynurə Zeynalova deyib.

Nazirlik rəsmisi təəssüf hissi ilə bildirib ki, ixtioz xəstəliyi ilə bağlı narahatedici rəqəmlər var: “Hətta bunun statistikasını da aparmışıq. Ölkədə 700-ə yaxın ixtioz xəstəsi var. Bununla bağlı dövlət proqramı qəbul olunub. Biz onları dərman və sarğı materialları ilə də təmin edirik”.

Sektor müdiri əlavə edib ki, bu gün uşaqlarda anadangəlmə qüsurlar da çoxalıb: “Nazirlər Kabinetinin müvafiq qərarı ilə nikahdan əvvəl müayinələr aparırıq. Müayinələr zamanı vətəndaşa deyə bilmirik ki, evlənməyin. Biz tövsiyə verə bilirik ki, siz talassemiya daşıyıcısısız. Evlənsəniz, xəstə uşaq doğulacaq. Onları evlənib-evlənməməsi özlərindən asılıdır. Bu gün hətta talassemiyanın artıq ağır formaları çoxalıb. Əvvəl alfa forması çox idisə, indi isə delta formasına keçib”.