DogruXerber.az: - Qaradağ rayonu Sahil qəsəbəsi Emin Quliyev 24 ünvanında yerləşən və həm də Şəhid Emin Quliyevin adına Sağlamlıq İmkanları Məhdud Uşaqlar üçün 9 saylı xüsusi İnternat məktəbindən şikayətçi olan, adının çəkilməsini istəməyən şəxs SəhərMedia xəbər portalının redaksiyasına müraciət edərək bildirib ki, cari ilin avqust-sentyabr ayları ərəfəsində nəvəsini əqli və nitq qüsurlu olduğuna görə sözügedən 9 saylı internat məktəbinə təhsildən geri qalmaması üçün yerləşdirmək istəyib və bunun üçün də müraciət edib. Şikayətçinin iddialarına görə məktəbin direktoru Əsgərova Afaqət xanım ilə görüşsə də, direktor aralarında yaranan "səmimi" dialoqdan sonra valideyni məktəbin Mahirə adlı müəllimi ilə əlaqələndirib.

Nəticədə məktəbin müəllimi Mahirə xanım uşağın nənəsindən uşağın bu internat məktəbinə daxil olması üçün müəyyən sənədləri və arasında 500-700 manat pul vəsaitini gətirməsini tapşırıb.

Şikayətçinin bildirdiyinə görə sonradan 500 manata razılaşsalar da, danışdıqları tarixə qədər pulun yalnız 400 manatını toplaya bilmişdir. İnternatın müəllimi isə bu məbləği görəndən sonra uşağın internata qəbul olma prosesini əngəlləmişdir. Şikayətçi iddia edir ki, uşağın adı əvvəlcə portalda çıxırdı, sonradan tələb olunan məbləğ internat məktəbinə verilmədiyi üçün uşağın adı portaldan silinib.

Qarşı tərəfin məsələ ilə bağlı mövqeyini öyrənmək üçün 9 saylı xüsusi İnternat məktəbi ilə əlaqə yaratmağa çalışdıq. Bizə bildirdilər ki: Direktor Afaqət xanım məzuniyyətdədir. Onun əvəzinə hazırda direktorun səlahiyyətini icra edən Vaqif müəllim açıqlama verdi. Açıqlamada qeyd olunur:

"9 SAYLI XÜSUSİ İNTERNAT MƏKTƏBİNƏ DAXİL OLMA SİSTEMLİ VƏ DÖVLƏT PROQRAMI ŞƏKLİNDƏDİR. BİZDƏ QƏBUL TİBBİ VƏ PEDAQOJİ RƏY ƏSASINDA OLUR. ƏGƏR QEYD ETDİYİNİZ UŞAQ HƏMƏN ƏRƏFƏDƏ BİZİM İNTERNAT MƏKTƏBİNƏ QƏBUL OLUNMAYIBSA, YƏQİN SİNİFDƏ ŞAGİRD SAYI TAMAMLANIB".//SƏHƏR MEDİA