Min illərdir torpağın altında qalmış tarixi əsərlər qazıntılar nəticəsində gün üzünə çıxmağa davam edir. Bunun son nümunəsi isə 2.000 illik döyüş arabasının hissələri olub.

"dogruxeber.tv" xəbər verir ki, təsadüf nəticəsində Uelsdə aşkarlanan bəzi arxeoloji tapıntılar tədqiqatçıları təəccübləndirib.

Uelsin Kral Hərbi Hava Qüvvələri hava limanının altında Keltlərə aid 2.000 illik əsərlər ortaya çıxıb.

Tapıntılar arasında e.ə. 60-cı ilə aid at ağızlığı və Uels ərazisində yalnız üç ədəd olduğu bilinən, atlı Kelt arabasının cilovlarını idarə etmək üçün istifadə edilən qırmızı naxışlı terret halqası da var.

Arxeoloqlar hesab edirlər ki, at ağızlığı və terret halqası 1943-cü ildə hava limanının inşası zamanı aşkarlanan Llin Keriyq Bax xəzinəsinin bir hissəsi ola bilər. Mediada xəzinə kimi tanınan bu tapıntılar 1940-cı illərdə üzə çıxarılan məşhur arxeoloji kolleksiyanın indiyədək itkin qalmış hissələri ola bilər. Bunların arasında at ləvazimatları və nadir döyüş arabası hissələri də yer alır.

Alimləri ən çox təəccübləndirən məqam isə hərbi baxımdan strateji əhəmiyyətə malik bir hava limanının altında 2.000 illik hərbi ləvazimatların aşkar olunmasıdır. Bu fakt bölgədə hərbi fəaliyyətin minilliklərdir davam etdiyini və həmin ərazinin ən azı 2.000 ildir hərbi baza kimi istifadə olunduğunu göstərir.

Britaniya ordusunun yüksək rütbəli zabitləri bu tapıntını belə şərh ediblər: "Bu əsərlər bizə 2.000 ildir qoruduğumuz torpaqların məsuliyyətini xatırladır"

Beləliklə, bu kəşf təkcə arxeoloji baxımdan deyil, həm də hərbi tarixin davamlılığı baxımından böyük maraq doğurur.