"Visual Capitalist" tərəfindən aparılan araşdırmada 2015-2024-cü illər arasında milyarderlərin miqrasiya hərəkətləri analiz edilib və ən çox milyarder qəbul edən və itirən ölkələrin siyahısı hazırlanıb.

"dogruxeber.tv" xəbər verir ki, son 10 ildə milyarderlərin ən çox axın etdiyi ölkə ilə bağlı gözlənilməz bir nəticə ortaya qoyub.

Çin milyarderlər üçün əsas cazibə mərkəzi oldu

Hesabata əsasən, Çin son 10 ildə xalis göstəriciyə görə ən çox milyarder qazanan ölkə olub. 2024-cü ilin məlumatlarına görə, Çində 501 milyarder var.

Son 10 ildə 73 milyarder Çinə köç edib, 48 milyarder isə ölkədən ayrılıb. Bu isə xalis 25 milyarder artımı deməkdir. Çindəki milyarderlərin ümumi sərvəti 2015-ci ildən bəri ikiqat artaraq 1,8 trilyon dollara çatıb.


Avropa və Şimali Amerika milyarder axınını qoruyur

Qərbi Avropa xalis göstəriciyə görə 20 milyarder qazanıb. Bölgədəki ümumi milyarder sərvəti 2,7 trilyon dollara çatıb, bu da 2023-cü illə müqayisədə 16% artım deməkdir.

Almaniya (117 milyarder), İsveçrə (85) və Böyük Britaniya (82) bölgənin ən varlı ölkələri sırasındadır.

Şimali Amerikaya gəlincə, son 10 ildə 55 milyarder bölgəyə köç edib, 42-si isə ayrılıb. 2024-cü ilin məlumatlarına görə, ABŞ-da 835 milyarder var və onların ümumi sərvəti 5,8 trilyon dollara çatıb. Bu, əvvəlki dövrlə müqayisədə 27,6% artım deməkdir.

Kaliforniya və Nyu-York ABŞ-ın ən varlı milyarderlərinin 40%-nə ev sahibliyi edir.


Yaxın Şərq və Afrika milyarder sərvətini artırır

2024-cü ildə Yaxın Şərq və Afrikada milyarder sərvəti 21,5% artıb.

Birləşmiş Ərəb Əmirlikləri (BƏƏ) 2023-2024-cü illər arasında milyarder sərvətini 39,5% artıraraq, İsraildən (32 milyarder) sonra bölgədə 18 milyarder ilə ikinci yerdə qərarlaşıb.

Şərqi Avropa: Ən böyük milyarder itkisi

Şərqi Avropa son 10 ildə xalis 29 milyarder itirib. Bunun əsas səbəbləri kimi Rusiya-Ukrayna müharibəsi və pandemiya göstərilir.

Çin, İsveçrə və ABŞ ən çox seçilən miqrasiya istiqamətləri olsa da, Şərqi Avropa milyarderlər üçün ən çox tərk edilən bölgə olub.

Bu araşdırma göstərir ki, milyarderlərin miqrasiyası əsasən iqtisadi sabitlik, vergi siyasəti və biznes mühiti ilə əlaqəlidir. Çin isə bütün iqtisadi çətinliklərə baxmayaraq, son 10 ildə dünyanın ən çox milyarder qazanan ölkəsinə çevrilib.