Alimlər Günəşdə baş verən güclü partlayışlar səbəbilə Yer kürəsində irimiqyaslı elektrik kəsintisi - "blekaut" təhlükəsi barədə xəbərdarlıq ediblər.

"dogruxeber.tv" "Bild"ə istinadən xəbər verir ki, Günəşdə baş verən güclü alov püskürmələri nəticəsində Yerə doğru yüksək enerjili kosmik radiasiya fırtınası yaxınlaşır. Bu radiasiya fırtınası telekommunikasiya sistemlərinə, elektrik şəbəkələrinə və peyk texnologiyalarına ciddi zərər vura bilər.

14 may tarixində qeydə alınan partlayış artıq Avropa, Asiya və Yaxın Şərqdə rabitə sistemlərinin sıradan çıxmasına, eləcə də ABŞ-ın şərq hissəsində elektrik təchizatında fasilələrə səbəb olub.

Hazırda NASA və digər kosmik agentliklər yaxın günlərdə yeni günəş radiasiyası boşalmalarının baş verəcəyi barədə xəbərdarlıq edir. ABŞ rəsmiləri bildirir: "Biz Günəş fırtınalarına eynilə zəlzələlər, qasırğalar və kiberhücumlar üçün etdiyimiz kimi hazırlaşmalıyıq".

Alimlər bu cür kataklizmlərə qarşı müdafiə strategiyalarının təcili hazırlanmasını və Günəşin aktivliyini izləmək üçün peyk müşahidələrinin genişləndirilməsini vacib sayır.