“AzerGold” QSC və “Regional İnkişaf” İctimai Birliyinin (RİİB) təşkilatçılığı ilə Daşkəsən rayonunda 5 İyun – Ümumdünya Ətraf Mühitin Mühafizəsi Gününə həsr olunmuş “Təbiətə qayğı missiyamızdır!” devizi altında təlim və təmizlik aksiyası keçirilib.

"dogruxeber.tv" xəbər verir ki, ətraf mühitin mühafizəsi, tullantıların düzgün idarə olunmasının təşviqi və ictimaiyyətin bu sahədə maarifləndirilməsi məqsədilə təşkil edilən tədbirlərdə QSC-nin əməkdaşları və RİİB könüllüləri iştirak ediblər.


Əvvəlcə Gəncə-Daşkəsən iqtisadi rayonunun ən böyük su hövzələrindən biri olan Qoşqarçayın Daşkəsən rayonunun Quşçu kəndindən keçən hissəsində plastik çirklənmənin ətraf mühitə təsirlərinə dair maarifləndirici təlim keçirilib. Təlim zamanı ətraf mühitin çirkləndirilməsinin qarşısının alınması, tullantıların təkrar emalı ilə təbiətin mühafizəsinə və ekoloji balansın saxlanılmasına töhfə verilməsi istiqamətində məruzələr dinlənilib.


Daha sonra tədbir iştirakçıları tərəfindən Qoşqarçayın sahilləri boyu, təqribən 2 hektara yaxın meşə ərazisi plastik, polietilen, metal, şüşə, kağız, karton və digər tərkibli tullantılardan təmizlənib. Yığılmış tullantılar çeşidlənərək, təkrar emala yönəldilib. Eyni zamanda aksiya iştirakçıları Daşkəsən şəhərinin mərkəzi küçələrinə yeni tullantı konteynerləri yerləşdiriblər.


Qeyd edək ki, “AzerGold” QSC ölkəmizin dağ-mədən sənayesini uğurla təmsil edən dövlət şirkəti olaraq, ekoloji məsələlərə xüsusi önəm verir. QSC hasilat və istehsalat proseslərini yerli və beynəlxalq ekoloji standartlara uyğun həyata keçirməklə yanaşı, regionlarda mütəmadi ekoloji layihələr təşkil edir. Hər il QSC-nin təşəbbüsü ilə ağacəkmə, yaşıllaşdırma və təmizlik aksiyaları həyata keçirilir.


Xatırladaq ki, Ümumdünya Ətraf Mühitin Mühafizəsi Günü 1972-ci ildə BMT-nin Baş Assambleyası tərəfindən təsis olunub. BMT-nin Ətraf Mühit Proqramı (UNEP) tərəfindən “Plastik çirklənmənin həlli yolları” bu ilin mövzusu seçilib. Mövzu çərçivəsində plastik tullantıların azaldılması və təkrar emalın təşviqi məqsədilə “#BeatPlasticPollution” kampaniyası həyata keçirilir.