ABŞ-da ilk dəfə olaraq 1-ci tip diabetdən əziyyət çəkən pasiyent kök hüceyrəyə əsaslanan eksperimental terapiya nəticəsində insulindən tamamilə imtina edib. Bu, “Zimislecel” adlı preparatın tətbiqi ilə mümkün olub.

Amanda Smith adlı 25 yaşlı Kanadalı qadın 10 ilə yaxındır ki, diabetlə yaşayırdı və gündəlik insulin qəbul edirdi. Ancaq yalnız bir dəfə aldığı kök hüceyrə müalicəsindən sonra onun bədəni artıq özü insulin istehsal etməyə başlayıb. Amanda artıq nə insulin iynəsinə, nə də qan şəkərini ölçən cihazlara ehtiyac duymur.

"dogruxeber.tv" xarici mediaya istinadən xəbər verir ki, bu nəticə ABŞ-da keçirilən klinik tədqiqat çərçivəsində qeydə alınıb. “Zimislecel” adlanan bu müalicə Vertex Pharmaceuticals şirkəti tərəfindən hazırlanıb və VX-880 kimi də tanınır. Terapiya, kök hüceyrələrdən hazırlanan və bədənin insulin istehsalını bərpa edə bilən pankreas hüceyrələrinin pasiyentə köçürülməsini əhatə edir.


Klinik sınaqlarda iştirak edən 12 pasiyentin 10-u artıq insulindən tamamilə azad olub. Bu isə 1-ci tip diabetin gələcəkdə daimi müalicəsi istiqamətində böyük ümidlər yaradır.

Amma bu müalicənin immun sistemi üçün basqılayıcı dərmanlar (immunosupressiya) tələb etməsi bəzi risklər daşıyır və geniş tətbiqi hələlik test mərhələsindədir.

Bu uğur hələlik geniş kütləyə tətbiq olunmasa da, elm insanlarının 1-ci tip diabetə qarşı apardığı mübarizədə tarixi bir addım kimi qiymətləndirilir. Yaxın illərdə bu terapiyanın daha çox pasiyent üçün əlçatan olması gözlənilir.