İrəvanın Kollektiv Təhlükəsizlik Müqaviləsi Təşkilatından (KTMT) çıxmaqla bağlı mümkün qərarı erməni xalqının maraqlarına uyğun deyil.

"dogruxeber.tv" xəbər verir ki, bu barədə Rusiya Dövlət Dumasının müdafiə komitəsinin sədri Andrey Kartapolov açıqlayıb.

O, qeyd edib ki, analoji qərarları hökumət başçısı təkbaşına qəbul edə bilməz: "Paşinyan indi təbii ki, Ermənistanın lideridir, amma hələ də orada erməni xalqı var. Ermənistanın KTMT-dən çıxması isə erməni xalqı üçün qətiyyən prioritet deyil. Paşinyanlar gəlib gedirlər, amma Ermənistan qalır. Ona görə də gəlin belə siyasətçilərin bəyanatlarına sakit reaksiya verək", - Kartapolov deyib.

Komitə sədri vurğulayıb ki, Ermənistanın KTMT-dən çıxması ilə bağlı qərarı respublika parlamenti də təsdiqləməlidir. Onun sözlərinə görə, başa düşmək lazımdır ki, beynəlxalq müqavilələr üzrə istənilən qərarlar mürəkkəb prosesləri, o cümlədən maliyyələşdirmə və sazişlərin müddətinin uzadılması məsələləri tələb edir. Deputat Rusiyanın Ermənistandakı hərbi bazasının statusuna xüsusi diqqət yetirib. O izah edib ki, obyekt KTMT çərçivəsində müqavilə deyil, ölkələr arasında ikitərəfli saziş əsasında fəaliyyət göstərir. Buna görə də o, lazım olana qədər orada vəzifələrini yerinə yetirməyə davam edəcək.

Qeyd edək ki, Paşinyan dünənki mətbuat konfransında bəyan edib ki, Ermənistanın Kollektiv Təhlükəsizlik Müqaviləsi Təşkilatından çıxması ölkənin assosiasiyaya üzvlüyünün dondurulmamasından daha çox ehtimal olunan variantdır.