dogruxeber.tv: - İnternet provayderləri son illər reklam çarxlarında elə bir sürət göstərirlər ki, adam baxanda elə bilir NASA ilə ortaq layihə həyata keçirirlər. "Ultra yüksək", "optik xətt", "raket kimi" kimi ifadələrlə vətəndaşı inandırırlar ki, bir düyməni basan kimi dünya sənindir. Amma düymə basılandan sonra olanlar dünyaya deyil, əsəblərin tarıma çəkilməsinə aparır.

Reallıqda internetin sürəti nə raketə, nə optikaya, nə də yüksəkliyə bənzəyir. Əksinə, modem sönüb yanır, router hərdən işə düşür, amma sən yenə də eyni səhifəni 10 dəqiqə yükləyirsən. Providerlər sözlərlə uçur, vətəndaş isə modemlə yerə ilişib qalır.

Rayon yerlərində "optik xətt" anlayışı artıq folklor elementinə çevrilib. Vətəndaş modemə baxır, internetin niyə işləmədiyini soruşanda cavab bu olur: “Sistem yenilənir.” Həmin sistem elə bil Ramazan təqvimi ilə işləyir, bayramdan bayrama düzəlir. İşıq varsa internet yoxdu, internet varsa sürət yoxdu, sürət varsa səhifə açılmır. Üstəlik, hər ay 20-30 manatlıq abunə haqqı da qətiyyətlə tutulur. Sürəti görə bilməyən vətəndaş, heç olmasa ödədiyi pulu hiss etməyə çalışır.

Pandemiya dövründə isə bu "sürətli internet" tam bir texniki kinoya çevrildi. Onlayn dərs deyəndə müəllimin səsi yox olurdu, şagird görüntüdə donurdu, internet isə ümumiyyətlə özü tətilə çıxırdı. Ana modemi döyür, ata kabeli dəyişir, uşaq isə Google Meet yerinə pəncərədən çölə baxırdı.

“100 MB sürətə qədər” ifadəsi artıq ölkədə yeni zarafata çevrilib. Çünki heç kim o sürəti görməyib, amma hamı pulunu ödəyib. Ən çox da gecə saat 3-də, hamı yatanda 3 MB sürət görünəndə sevinən insanlar var. Belə çıxır ki, internetlə işləmək üçün gecə növbəsinə keçmək lazımdır.

Provayderlər sürətdən danışır, insanlar isə sabitlikdən. Amma görünən odur ki, sabit olan tək şey – hər ay gələn abunə haqqıdır. Verilən vədlər isə külək kimi – gəldi, keçdi, getdi.

"dogruxeber.tv" olaraq bildiririk ki, vətəndaş bu sürətdən bezib. İnternetə baxmaq istəyənlər indi daha çox pəncərəyə baxır, bəlkə hava dəyişər, bəlkə router utanar, bəlkə sistem oyanar. Amma görünən odur ki, sistem yatır, modem əsnir, sürət isə heç vaxt gəlmir.

Hələ utanmadan da statistik rəqəmlər güya Azərbaycanın internet sürətinə görə birinci yerdə olduğunu deyir.