Uşaqların gülümsəməsi hər kəs üçün sevinclidir, amma bu sevincin telefon kamerası qarşısında dəfələrlə təkrar etdirilməsi artıq suallar doğurur. Azərbaycanda bəzi valideynlər üçün uşaqlar sadəcə ailə üzvü deyil, eyni zamanda sosial media kontenti üçün "material"a çevrilib.

“dogruxeber.tv”ın müşahidələrinə əsasən, TikTok və digər platformalarda balaca uşaqların gündəlik həyatı, ağlaması, yemək yeməsi, ilk addımı, dərs oxuması və hətta cəzalandırılması belə izlənmə sayı və “like” uğrunda yayımlanır. Bu isə həm etik baxımdan, həm də psixoloji cəhətdən ciddi suallar doğurur. Uşağın fikri, razılığı, ya da hüquqları nəzərə alınmadan hər anı paylaşmaq nə dərəcədə düzgündür?

Uşaqlarla bağlı kontentlərin çoxunun əsas hədəfi sosial təsir və izləyici qazanmaqdır. Bu isə zamanla valideynin diqqətini uşağın ehtiyaclarından çox görüntüsünə yönəldir. Psixoloqlar qeyd edir ki, bu cür davranış uşaqlarda özgüvən probleminə, diqqət asılılığına və şəxsi sərhədlərin pozulmasına səbəb ola bilər.

“dogruxeber.tv” olaraq belə bir həssas mövzuda maariflənmənin və məsuliyyətli davranışın vacibliyini vurğulayırıq. Sosial şəbəkələrdə məzmun yaratmaqla valideynlik arasındakı sərhəd unudulmamalıdır. Uşaq hər şeydən əvvəl izləyici kütləsi üçün yox, sevgi və diqqət üçün böyüdülməlidir.