Qlobal iqlim dəyişiklikləri artıq uzaq gələcəyin problemi deyil. Bu proses Azərbaycanda da öz təsirini göstərməkdədir. Yay fəslində havaların normadan artıq isti keçməsi, bölgələrdə quraqlığın artması, kənd təsərrüfatında məhsuldarlığın aşağı düşməsi və su ehtiyatlarının tükənməsi bu dəyişikliklərin yalnız başlanğıcıdır. Təəssüf ki, bu qədər açıq əlamətlərə baxmayaraq, cəmiyyətin bu məsələ ilə bağlı reaksiyası hələ də passivdir.

“dogruxeber.tv” tərəfindən mövzu ilə bağlı araşdırmalar zamanı məlum olub ki, əhalinin əksəriyyəti iqlim dəyişikliyini elmi və statistik məsələ kimi qəbul edir, lakin gündəlik həyatla əlaqələndirmir. Halbuki bu dəyişikliklər insanların sağlamlığından tutmuş, ərzaq təhlükəsizliyinə, su təchizatına və enerji sərfiyyatına qədər bütün sahələrə təsir edir. Və bu təsir artıq hiss edilməyə başlayıb.

Kür və Araz çaylarında suyun səviyyəsinin azalması, Aran bölgəsində torpaqların çatlaması, meşə örtüyünün daralması və kənd təsərrüfatı üçün əlverişli mövsümlərin dəyişməsi konkret təhlükədir. Amma fərdi və ictimai səviyyədə bu təhlükənin qarşısını almağa yönəlmiş addımlar demək olar ki, atılmır. Əhali nə suya qənaət edir, nə də tullantıların azaldılması ilə bağlı ciddi addımlar atır. Çünki məsələ kifayət qədər izah olunmur, gündəmdə saxlanılmır və həyatın bir hissəsi kimi göstərilmir.

“dogruxeber.tv” olaraq qeyd edirik ki, iqlim dəyişikliyi ilə mübarizə təkcə beynəlxalq təşkilatların və ya dövlət strukturlarının öhdəsinə buraxılmalı deyil. Hər bir vətəndaşın atdığı kiçik addımlar — plastikdən az istifadə, enerjiyə qənaət, təkrar emal vərdişi, su israfının qarşısını alma böyük dəyişikliklərin əsasını qoya bilər. Ancaq bunun üçün ilk növbədə məsuliyyət və məlumatlılıq formalaşmalıdır.

Əgər cəmiyyət bu prosesə hələ də “bizlik deyil” gözü ilə baxacaqsa, iqlim dəyişəcək, amma insan uyğunlaşa bilməyəcək. Nəticədə, yalnız təbiət yox, həyat tərzimiz, sağlamlığımız və gələcəyimiz də risk altına düşəcək.