Azərbaycan ilə Türkiyə arasında əlaqələr yeni mərhələyə qədəm qoyur. Son dövrlərdə iki ölkə rəhbərlərinin qarşılıqlı səfərləri, imzalanan sənədlər və birgə keçirilən layihələr bu strateji tərəfdaşlığın daha da dərinləşdiyini göstərir.

“dogruxeber.tv” xəbər verir ki, bu münasibətlər təkcə siyasi deyil, iqtisadi, hərbi, mədəni və enerji sahələrində də güclənməkdədir.

Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğanın tez-tez baş tutan görüşləri iki dövlət arasında qarşılıqlı inamın və birliyin bariz nümunəsidir. Bu il ərzində keçirilən yüksək səviyyəli görüşlərdə regional təhlükəsizlik, iqtisadi əməkdaşlıq və nəqliyyat əlaqələrinin genişləndirilməsi məsələləri əsas müzakirə mövzularından olub. Xüsusilə Zəngəzur dəhlizi, TANAP və digər enerji layihələri kimi regional əhəmiyyətli təşəbbüslər iki qardaş ölkənin maraqlarının üst-üstə düşdüyünü nümayiş etdirir.

“dogruxeber.tv” yazır ki, Şuşa Bəyannaməsi ilə təsdiqlənmiş müttəfiqlik münasibətləri artıq praktiki əməkdaşlıq müstəvisində özünü daha açıq şəkildə göstərir.

İqtisadi göstəricilər də bu münasibətlərin real nəticələr verdiyini sübut edir. Cari ilin ilk yarısında Azərbaycan ilə Türkiyə arasında ticarət dövriyyəsi 5 milyard dollara yaxınlaşıb. Müdafiə sənayesi sahəsində əməkdaşlıq isə hər iki ölkənin regional güc kimi mövqeyini gücləndirməkdədir. Müştərək hərbi təlimlər, texnoloji transfer və sənaye əməkdaşlığı da bu strateji ittifaqın təməl daşlarındandır.

Azərbaycan-Türkiyə münasibətləri sadəcə diplomatik əlaqə deyil, eyni zamanda ortaq tarixə, mədəniyyətə və milli dəyərlərə söykənən qardaşlıq münasibətidir. Bu münasibətlər regionda sülhün, sabitliyin və davamlı inkişafın təminatçısı kimi çıxış edir.