Texnologiyanın sürətlə inkişaf etdiyi dövrdə internet həyatımızın ayrılmaz hissəsinə çevrilib. Lakin gündəlik istifadə etdiyimiz bu rahatlıq, bəzən ciddi təhlükələr də daşıyır.

“dogruxeber.tv” xəbər verir ki, xüsusilə ictimai və şəxsi Wi-Fi şəbəkələrindən istifadə zamanı edilən bəzi vərdişlər şəxsi məlumatların ələ keçirilməsi ilə nəticələnə bilər. Bir çox istifadəçi bu risklərin fərqində olmadan gündəlik həyatında təhlükəli davranışlar sərgiləyir.

İlk təhlükəli vərdiş – ictimai Wi-Fi şəbəkələrinə parolsuz qoşulmaqdır. Kafelərdə, hava limanlarında, alış-veriş mərkəzlərində təqdim olunan bu pulsuz şəbəkələr ilk baxışdan rahat görünsə də, əslində hakerlər üçün ideal fürsətdir.

“dogruxeber.tv” bildirir ki, bu tip açıq şəbəkələr üzərindən istifadəçilərin bank hesab məlumatları, sosial media parolları, e-poçt girişləri kimi şəxsi məlumatları izlənilə və ələ keçirilə bilər.

İkinci riskli vərdiş – Wi-Fi şifrəsini güvəndə saxlamamaq və ya zəif şifrə istifadə etməkdir. Evdə və ya ofisdə istifadə edilən router şifrəsi "12345678", "admin", "qonaq123" kimi sadə və təxmin edilə bilən olduqda, bu şəbəkəyə daxil olmaq hakerlər üçün uşaq oyuncağına çevrilir. Bir dəfə daxil olduqdan sonra isə bütün cihazlar – telefonlar, noutbuklar və hətta “ağıllı” cihazlar nəzarət altına keçə bilər.

Üçüncü təhlükəli vərdiş – təhlükəsizlik proqram təminatlarını yeniləmədən Wi-Fi şəbəkəsindən istifadə etməkdir. Router proqram təminatı (firmware) və cihazlarda olan antivirus proqramlarının köhnəlməsi, sistemdəki boşluqları artırır. Hakerlər isə məhz bu boşluqlardan istifadə edərək, istifadəçinin internet fəaliyyətini izləyə və cihazları nəzarətə ala bilərlər.

Bu təhlükələrdən qorunmaq üçün hər bir istifadəçi öz internet təhlükəsizliyinə ciddi yanaşmalıdır. Router şifrələri güclü və unikal olmalı, ictimai Wi-Fi istifadə edilən zaman VPN (virtual şəxsi şəbəkə) aktivləşdirilməli və heç bir şəxsi məlumat paylaşılmamalıdır. Həmçinin, istifadə olunan cihazların proqram təminatı daim yenilənməlidir.

Texnologiya həyatımıza rahatlıq gətirsə də, ehtiyatsızlıqla böyük problemlərə yol aça bilər. Bir kliklə həyatınızı başqasının əlinə verməmək üçün, bu vərdişləri nəzarətdə saxlamaq vacibdir.