İnsan həyatını qorumağa məsul olan səhiyyə sistemi hər gün yeni faciələrlə gündəmə gəlir. Sadə bir əməliyyat, adi bir müalicə zamanı yol verilən səhlənkarlıq insanların həyatını əlindən alır. “dogruxeber.tv” yazır ki, son vaxtlar doğuş zamanı ölən anaların və körpələrin artması artıq təsadüfi deyil, sistemli məsuliyyətsizliyin nəticəsidir. Ailələr sevinc gözlədiyi anda qara yasa qərq olur.

Estetik əməliyyat adı ilə fəaliyyət göstərən klinikalar isə ayrıca faciə mənbəyinə çevrilib. Gənc qadınlar gözəllik arzusuyla əməliyyata girir, amma bəziləri bir daha həmin masadan qalxmır. Son illər bu səbəbdən həyatını itirənlərin sayı artır, amma məsuliyyət daşıyan klinikalar və həkimlər çox vaxt cəzasız qalır. Daha dəhşətlisi odur ki, bəzi hallarda əməliyyatları tibbi diplomu belə olmayan şəxslər həyata keçirir. Bu, açıq cinayət və insan həyatına qəsddir.

“dogruxeber.tv” qeyd edir ki, gizlədilən hər ölüm faktı sabah başqa bir ailənin faciəsinə çevrilir. Səhiyyədə məsuliyyət və şəffaflıq yoxdursa, hər bir vətəndaş ölüm təhlükəsi ilə üz-üzədir. Diplomsuz şəxslərin insan bədəninə müdaxilə etməsi, həkim adını daşıyanların isə məsuliyyətsizliklə həyatları məhv etməsi artıq cəmiyyətin səbrini tükəndirib. Ədalət yalnız sözlə yox, real cəzalarla təmin olunmalıdır, əks halda bu ölümlərin ardı kəsilməyəcək.