Azərbaycanda toy yalnız ailə qurmaq mərasimi deyil, eyni zamanda cəmiyyət içində bir status və münasibət ölçüsüdür. Son illərdə bu anlayış daha da dərinləşib, toyda iştirak etmək bir çox ailənin və gəncin maliyyə imkanlarını aşacaq qədər bahalı vəzifəyə çevrilib. İstər yaxın qohum, istər uzaq tanış olsun, dəvət aldığın toyda zərf təqdim etməmək, bəzi hallarda sosial münasibətlərin kəsilməsinə qədər gedib çıxır. Bu isə vətəndaşları məcbur edir ki, kredit götürərək toy mərasimlərində iştirak etsinlər. Məhz bu məsələ "dogruxeber.tv" tərəfindən araşdırılıb və nəticələr düşündürücüdür.

Əldə olunan məlumatlara görə, son 3 ildə mikrokredit və lombardlara müraciət edən şəxslərin əhəmiyyətli bir hissəsi toy və yas xərcləri üçün borc alıb. Bu hallar təkcə ailələr üçün deyil, cəmiyyət üçün də sosial yük yaradır. Müasir cəmiyyətdə toy zərfi artıq simvolik deyil, real iqtisadi məsuliyyətə çevrilib.

"dogruxeber.tv" araşdırmasında bəlli olub ki, bəzi insanlar ayda 300-400 manat gəlir əldə etməsinə baxmayaraq, bir ayda 3-4 toya dəvət alır və ümumi 600 manatdan çox zərf xərcləyir. Bu rəqəmlər, xüsusilə gənc ailələr və işləyən tələbələr üçün ciddi problemdir.

Reallıq isə ondan ibarətdir ki, insanların əksəriyyəti bu xərcləri normal qarşılayır, etiraz etməkdən çəkinir, "ayıb olar" düşüncəsi ilə susur və bu susqunluq sosial təzyiqi daha da gücləndirir. Toy sahibləri də bir növ bu zərf sisteminə güvənərək planlarını qururlar. Yəni iştirakçının boynuna düşən yük, təşkilatçının gözlədiyi gəlirə çevrilir. Bu zəncir qırılmadıqca, toya getmək üçün kredit götürənlərin sayı artacaq. O zaman artıq bu məsələ sadəcə adət-ənənə deyil, milli sosial problemə çevrilmiş olur.