Ölkədə minimum əməkhaqqı 345 manat olaraq müəyyən edilib. Bu vəsaitlə Bakıda bir insanın ay ərzində yaşaması rəsmi olaraq “mümkündür”. Amma real həyat bu rəqəmlərin arxasında hansı reallığı gizlədir?

"dogruxeber.tv" olaraq bir günlük real eksperiment etdik: cibimizdə yalnız bir günə düşən məbləğlə — 11 manat 50 qəpiklə — Bakı şəhərində adi bir vətəndaş kimi yaşayış mümkün olub-olmadığını yoxladıq.

Səhər saat 08:00-da yola çıxdıq. İlk ehtiyac – nəqliyyat. Evin yaxınlığından iş yerinə qədər avtobus və metro ilə getmək üçün 2 gedişə ehtiyac var. “BakıKart”a 1 manat 40 qəpik yükləndi. Bu, günün başlanğıcında məbləğin təxminən 12%-nin xərclənməsi deməkdir. Səhər yeməyi məsələsi isə daha çətin oldu. Şəhər mərkəzində ən ucuz çörək və çay təklifi bir çay evində 2 manat civarında idi. Ən sadə variant – marketdən 30 qəpiklik lavaş və 1 manatlıq pendir dilimi almaqla səhər yeməyi “yola verildi”.

Saat 13:00 radələrində nahar vaxtı gəldi. Orta statistik bir insan üçün bu, ən vacib yeməklərdən biridir. Lakin ucuz kafelərdə belə sadə plov+kotlet+kompot menyusu 4-5 manat arasında dəyişir. Bu səbəbdən marketdən bir ətli pirojki (70 qəpik) və ayran (80 qəpik) alaraq, ümumilikdə 1 manat 50 qəpik xərcləndi.

"dogruxeber.tv" olaraq müşahidə etdik ki, gün ərzində balanslı qidalanma minimum maaşla demək olar ki, mümkün deyil. Ya sağlamlıqdan, ya da doyumdan güzəştə getmək məcburiyyətindəsən.

Axşam saatlarında yolun geri dönüşü üçün 70 qəpik ayrıldı və cibdə 4 manat 50 qəpik qaldı. Bununla ya axşam yeməyi alınmalı, ya da ehtiyac halında qənaət edilməli idi. Dərman, gigiyena vasitələri və digər xərclər nəzərə alınmasa belə, adi bir gün ərzində 11 manat 50 qəpik kifayət etmədi. Xüsusilə kirayədə yaşayan və ailə saxlayan bir insan üçün bu vəsaitin ay boyunca nələrə kifayət edəcəyi sual doğurur.

Eksperiment göstərdi ki, minimum maaşla bir gün yaşamaq mümkündür, amma bu "yaşamaq" daha çox “var olmaq” mənasında başa düşülməlidir. Qidalanmadan tutmuş, sosial həyata qədər hər şeydən məhrum şəkildə. Hər şeyin qiymətinin sürətlə artdığı bir dövrdə bu məbləğlə real həyat yaşamaq çox çətindir və daha çox statistikaya uyğunlaşdırılmış bir rəqəm kimi görünür.