Dünən Vətən müharibəsində iştirak etmiş 25 nəfər qazimiz idmançı Kamil Zeynallının təşkilatçılığı ilə Bakının məşhur restoranlarının birində İlyas Yalçıntaşın konsertində iştirak ediblər.
Tədbirdə qonaq olan qazi Mehdiyev Həsən Rəcəb oğlu Sonxeber.az-a keçdiyi döyüş yolundan danışıb:

"Sentyabr ayının 21-də könüllü ordu sıralarına yazılmışdım. Sentyabr ayının 29-u isə səfərbərlik tərəfindən çağırıldım. Döyüş yolumuz Füzuli rayonundan başlayıb. Cəbrayıl rayonuna kimi döyüşmüşük. Cəbrayılda yaralanmışıq. 9 nəfər birlikdə tank əleyhinə minaya düşdük. 1 nəfər şəhid oldu, 8 nəfər isə yaralandı.
Keçdiyimiz döyüş yolundan bizim çox xatirələrimiz var: şəhidlərimizin döyüş meydanından çıxarılması, yaralılarımızın xilas edilməsi, mühasirəyə düşməyimiz və s . Bu gün döyüş yoldaşlarımızla hamımız birlikdəyik. Ən yaxın dostlarımdan da şəhid olanlar oldu. Özüm yaralı ola-ola, dostum qollarımda şəhid oldu. Bütün şəhidlər bizim qardaşlarımızdır".