Bir zamanlar Azərbaycanın sevilən musiqi kollektivlərindən olan "Savalan” qrupu uzun fasilədən sonra yenidən səhnəyə qayıdır.

DogruXeber.tv xəbər verir ki,bu barədə Qaynarinfo-ya qrupun rəhbəri İffət Əsgər məlumat verib.

Onun sözlərinə görə, konsert proqramı mayın 14-də Beynəlxalq Muğam Mərkəzi-də keçiriləcək:

"Konsert qrupun ilk bədii rəhbəri Novruz Novruzlunun əziz xatirəsinə həsr olunub. Proqram "Dost, Dost, Dost - Bilinməyən bir eşq yaşadır insanı” adlanır. Çalışacağıq ki, gecədə musiqisevərlərə duyğusal və zəngin repertuar təqdim edək”.

Qeyd edək ki, gecənin aparıcısı Səyyarə Səyyaf, qiraətçisi isə Əməkdar artist Qasım Nağı olacaq. Konsertdə vokal ifaçıları Azər Çələbi və Naser Nayyeri, eləcə də musiqiçilər- kanonda Məhta Məhəmmədəlizadə, balabanda Anar Vəlizadə, tarda Vahid Süleymanov, klavişdə Elnur Hüseynov, davulda Anar Quliyev və nağarada Əli Elnuroğlu çıxış edəcək.

Proqramda İmadəddin Nəsimi, Şah İsmayıl Xətai, Neyzən Tevfik, Ramiz Rövşən və Şahin Musaoğlunun sözlərinə bəstələnmiş əsərlər, eləcə də xalq mahnıları səsləndiriləcək.

Xatırladaq ki, "Savalan” qrupunun yaradıcısı Novruz Novruzlu 2018-ci ildə ürək tutmasından vəfat edib və Xırdalan qəbiristanlığında dəfn olunub. Qrup 20 Yanvar faciəsindən sonra yaradılıb və fəaliyyətində əsasən dini-mistik, vətənpərvər musiqilərə üstünlük verib.