dogruxeber.tv: - Kürdəmir sakini talassemiya xəstəsi oğluna əlillik dərəcəsi təyin etdirə bilmir.
Bu barədə, Kürdəmir rayon, Qarabucaq kənd sakini Zahid Mehdiyev “Gözətçi”yə göndərdiyi şikayətdə bildirib. Onun sözlərinə görə, oğlu Ülvi Mehdiyev (26.10.2002-ci il təvəlldlü) 17.09.2012-ci ildən “Alfa Talassemiya” diaqnozu ilə Respublika Talassemiya Mərkəzində qeydiyyatdadır və oğlu hər ay həmin mərkəzdə pulsuz tibbi müayinədən keçirilib.

Ülvi Mehdiyev 17.09.2012-26.10.2020 ci illlərdə 18 yaşına kimi 200 manat “sağlamlığından məhrum olma” müavinəti alıb. Ancaq 18 yaşı tamam olduqdan sonra müavinət dayandırılıb.

Z. Mehdiyev deyir ki, oğluna əlillik dərəcəsinin təyin edilməsi üçün Əlillərin Bərpa Mərkəzinə yaxınlaşıb. Mərkəzdən onu Kürdəmir rayon Mərkəzi Xəstəxanasına (MX) yönləndiriblər. Kürdəmir rayon MX-dan isə bildirilib ki, əlilliyin təyin edilməsi onların tabeliyində deyil.

Daha sonra Zahid Mehdiyev 03.02.2021- ci ildə Respublika Talasssemiya Mərkəzindən “ambulator xəstənin tibbi kartasından çıxarış” edərək sənədləri Tibbi-Sosial Ekspert Komissiyasına (TSEK) təqdim edib. Ancaq bir müddətdən sonra ona “natamam doldurma” ilə imtina cavabı gəlib. Ülvi Mehdiyevin sənədləri təkrar TSEK-ə təqdim edilsə də, hələ də nə təsdiq, nə də inkar cavabı gəlməyib.

Məsələ ilə bağlı “Gözətçi” olaraq Əmək və Əhalinin Sosial Müdafiəsi Nazirliyinə sorğu göndərilib.// dia.az