dogruxeber.tv: - “Ümumiyyətlə, bir tərəfdən kadr islahatı, digər tərəfdən köhnə idarəçilik sisteminin qalması xeyli suallar doğurur. Amma mənə elə gəlir ki, atılan bir çox addımlar həm eksperimental xarakter daşıyır, yəni özünü doğruldacağı təqdirdə o sistemə keçmək mümkün olacaq. Amma burda çox şey idarəçilərin bacarığından, qabiliyyətindən, onların psixologiyasından, əhaliylə necə işləmək tərzindən asılıdır”.

Bunu Moderator.az-a açıqlamasında professor Qulu Məhərrəmli söyləyib. Q.Məhərrəmli bir çox İcra Hakimiyyətlərinin rüşvətə, korrupsiyaya bulaşdığını deyib:

“Ona görə İcra Hakimiyyətlərin hamısını eyni tərəzidə deyil axı, onların içərisində babat işləyənləri də, rüşvətxorları da, korrupsiyaya uğrayanları da var. Biz adətən yaxşıları nümunə götürürük. Mən bunu irəliyə doğru bir addım hesab edirəm və güman edirəm ki, bunun idarəçilik, əhalinin sosial problemlərinin, bürokratik aparatın sadələşdirilməsi baxımından müəyyən faydası ola bilər. Amma əlbəttə ki, bunu reallıq, gerçəklik, həmin strukturların, təyin olunan şəxslərin iş bacarıqları, qabiliyyətləri daha dəqiq göstərəcək ki, biz hansı yolla gedirik”.

Qeyd edək ki, ölkə başçısının sərəncamı ilə Emin Hüseynovun bundan sonra Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi kimi fəaliyyət göstərməsi İcra Hakimiyyətlərinin ləğvini bir daha gündəmə gətirib.