"dogruxeber.tv" xəbər verir ki, bazar ertəsi Efiopiyanın Oromiya bölgəsində bir qrup Çin vətəndaşını hədəf alan hücum zamanı bir nəfər ölüb. Bu barədə səfirlik məlumat yayıb.

Paytaxt Əddis-Əbəbədən təxminən 160 km quzeydə yerləşən Qarba Quaraça qəsəbəsində baş verən insident zamanı silahlılar doqquz Çin vətəndaşına atəş açıb, onlardan birini öldürüb.

"Təəssüf ki, onlardan biri dünyasını dəyişib", - bəyanatda təsdiqlənib.

Səfirlik Çin vətəndaşlarına “yüksək riskli ərazilərdən” uzaq durmaq barədə barədə xəbərdarlıq edib.

Həmçinin səfirlik əlavə edib ki, Oromiya və qonşu bölgələrdə "silahlı hücumlar, adam oğurluğu və quldurluq halları" adi haldır.

Noyabr ayında imzalanmış sülh sazişindən sonra Tiqrayın şimalında nisbi sakitlik bərpa olunsa da, Oromiyada hökumət qüvvələri ilə üsyançı Oromo Azadlıq Ordusu (OLA) arasında münaqişə davam edir.

Son bir neçə həftə ərzində bölgənin qonşu Amhara ilə sərhədləri ətrafında baş verən toqquşmalar da insan tələfatına səbəb olub.

Keçən həftə Nigeriyanın Danqot Sement şirkətinin 20 işçisi bölgədə naməlum silahlı şəxslər tərəfindən qaçırılıb. Daha sonra onların sərbəst buraxıldığı bildirilib.

Dekabr ayında bəzi Danqot Sement işçiləri də qaçırıldı və pul ödənildikdən sonra sərbəst buraxıldılar.

dogruxeber.tv
Jalə Asman