dogruxeber.tv: - Xəbər veridiyimiz kimi, Gəncə Ağır Cinayətlər Məhkəməsində Tovuz rayonunda 10 yaşlı Nərmin Quliyevanı qətlə yetirməkdə ittiham olunan İlkin Süleymanova hökm oxunub. Hökmə əsasən, İ.Süleymanov 18 il müddətinə azadlıqdan məhrum edilib.

Bu qərar isə onun yaxınları tərəfindən narazılıqla qarşılanıb. Onlar İ.Süleymanovun cinayətkar olmadığı ilə bağlı fikirlər səsləndirir, aidiyyatı qurumlardan “Nərmin işi”nə yenidən baxmağı tələb edirlər.

Bu səbədən İ.Süleymanovun işinə yenidən baxıla biləcəyi barədə xəbərlər dolaşır. Bəs, bu, mümkündürmü?

Məsələ ilə bağlı Əfv Məsələləri Komissiyasının üzvü, Konstitusiya Araşdırmalar Fondunun prezidenti Əliməmməd Nuriyev Bakupost.az -a açıqlamasında vurğulayıb ki, “Nərmin işi”ndə müəyyən təzadlar var:

“Məsələ ilə bağlı istintaqda qüsurların olduğunu mediadan da görürük. Məhkəmə sənədlərində problemlərin çoxu çözülməyib, araşdırılmayıb. Mühakimə prosesindəki şübhələr çürüdülməyib. Şəxsin cinayəti tam sübuta yetirilmədiyi müddətdə onu cinayətkar adlandırmaq, məhkum etmək olmaz. Ona görə də, bu qərar ictimai vicdanda narahatlıq doğurub. Çünki İ.Süleymanov haqqında verilən ekspertizalar, hadisə haqqında məlumatlarla bağlı təzadlar mövcuddur. Bu təzadların aradan qaldırılması da məhkəmənin işi idi. Təəssüf ki, məhkəmə bu məsələnin üzərindən sükutla keçdi”.

Hüquqşünas İ.Süleymanovun işinə baxılması üçün daha iki imkanın olduğunu bildirib:

“Azərbaycanda məhkəmə-mühakimə sistemi üçpilləlidir. Bu məsələ ilə bağlı isə sadəcə, birinci pillə qərar verib. Bu o deməkdir ki, İ.Süleymanovun daha iki imkanı var: apellyasiya və Ali Məhkəmədə işə təkrar baxma mərhələləri. Əlavə olaraq, 4-cü stansiya olmasa da, şəxsin ədalətli mühakimə olunmaması və qanunsuz şəkildə azadlıqdan məhrum edilməsinə görə Avropa Məhkəməsinə müraciət edilə bilər. Onunla bağlı verilmiş qərar Apellyasiya Məhkəməsində qüvvədə qalarsa, Ali Məhkəmə imkanı var. Ali Məhkəmədə də qüvvədə qalarsa, ədalətli mühakimə hüququnun pozulması ilə bağlı Avropa Məhkəməsi və vəkillərinə müraciət edə bilər”.