20-dən çox ölkə Qırmızı dənizdə ABŞ-ın rəhbərlik etdiyi xüsusi əməliyyat olan "Prosperity Guardian" (Rifahın keşikçisi-red.) beynəlxalq əməliyyatında iştirak etməyə razılaşıb.

"dogruxeber.tv" "Reuters"ə istinadən xəbər verir ki, bu barədə Pentaqon məlumat yayıb.

"Bəzi hallarda gəmilər olacaq. Digər hallarda bu, personal və ya digər dəstək növləri ola bilər”, deyə Pentaqonun nümayəndəsi Patrik Rayder brifinq zamanı bildirib.

Eyni zamanda o, əlavə edib ki, koalisiyaya qoşulan ən azı 8 ölkə öz adlarının açıq şəkildə göstərilməsindən imtina edib.

"Reuters" qeyd edib ki, bu, İsrail və HƏMAS qruplaşması arasında müharibə səbəbindən bölgədə gərginliyin artması fonunda əməliyyatın siyasi həssaslığına işarə edə bilər.

Xatrıladaq ki, HƏMAS yaraqlılarının hücumuna cavab olaraq İsrail Qəzza zolağına qarşı əməliyyat başlatdıqdan sonra yəmənli husilər gəmilərə hücumları gücləndirib. Dekabrın 9-da onlar Qırmızı dəniz vasitəsilə İsrailə üzən bütün gəmilərə hücum edəcəkləri ilə hədələyərək fələstinlilərə dəstək ifadə ediblər.

Husilər artıq dekabrın 3-də ABŞ hərbi gəmisinə hücum da daxil olmaqla bir neçə ticarət gəmisini hədəfə alıblar. Hücumlar fonunda bir neçə qlobal gəmiçilik şirkəti gəmilərin Süveyş kanalından keçməsini dayandırıb və ya onları başqa marşrutlarla yönləndirib, bu daha uzun və daha bahalı prosesdir.

Artan gərginlik fonunda Səudiyyə Ərəbistanı Birləşmiş Ştatları Yaxın Şərqdə münaqişənin genişlənməsinin qarşısını almaq üçün Yəmən husilərinə qarşı "təmkin göstərməyə” çağırıb.

Dekabrın 18-də Pentaqon Qırmızı dənizdə gəmiçilik təhlükəsizliyini təmin etmək məqsədilə beynəlxalq "Prosperity Guardian” əməliyyatına başladığını elan edib. Əməliyyatda Kanada, Fransa, Böyük Britaniya və digər ölkələr də iştirak edəcək.

Dekabrın 21-də husilər ABŞ-ın xüsusi əməliyyatına baxmayaraq, Qırmızı dənizdə gəmilərə hücumu davam etdirəcəklərini vəd ediblər.