dogruxeber.tv: - “Bilmirəm, “Azərbaycan Dəmir Yolları”nda (ADY-red) xanım əməkdaşlara avtomobil hədiyyə edilməsi nə dərəcədə qanunvericiliyə uyğundur. Bir az çətindir. Parlamentdə yalnız komitə sədrlərinin və ondan yuxarı əməkdaşların xidməti avtomobilləri var. Qalan hallarda isə deputat lazım olanda parlament rəhbərliyinə müraciət edir, onun üçün yanacaq, yol vərəqi hazırlanır və bundan istifadə edir. Bu da çətinlik törətdiyi üçün, demək olar, heç bir deputat istifadə etmir”.

Bu sözləri Pravda.az-a açıqlamasında Milli Məclisin İnsan hüquqları komitəsinin sədr müavini Tahir Kərimli deyib.

“Bəzi başqa dövlətlərdə deputatların xidməti maşınları da, sürücüləri də var. Yəni hər dövlətin özünəməxsusluğu mövcuddur. Mümkün qədər ölkəmizdə xidməti avtomobillər az verilməlidir. Xidməti avtomobillərin az verilməsi dövlət büdcəsini də yükdən qurtarar. Yadımdadır, 1990-ci illərin əvvəllərində ABŞ-də olanda baş idarədə yalnız bir neçə adamın xidməti avtomobili olardı. Digərləri həmin müəssisənin avtomobilindən istifadə edə bilərdilər. Qalan hallarda işə gəlib-getmək, yaxud başqa məsələlərdən ötrü şəhər nəqliyyatından istifadə edərdilər...”, - deputat bildirib.

Qeyd: "Azərbaycan Dəmir Yolları" QSC-nin 3 xanım əməkdaşına xidməti avtomobil verilməsi müzakirələrə səbəb olub.