Qazaxıstan prezidenti Kasım-Jomart Tokayev narkotik istehsalına görə məsuliyyəti sərtləşdirən qanunu imzalayıb.

"dogruxeber.tv" xarici mediaya istinadən xəbər verir ki, ölkə parlamenti daha əvvəl bu qanunu təsdiqləyib. Qanuna əsasən, narkotik vasitələrin istehsalına, habelə vəzifəli şəxslər tərəfindən narkotik vasitələrin istehsalı, emalı və istehsalına görə cinayət məsuliyyəti sərtləşdirilib. Bu cür cinayətlərə görə təqsirkarlar əmlakı müsadirə olunmaqla 15 ildən 20 ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırıla bilər.

Eyni zamanda, narkotik lombardlarının cəzası da yüngülləşdirilib. Belə bir cinayəti ağırlaşdırıcı hallar olmadan ilk dəfə törətməyə görə əmlakı müsadirə olunmaqla 5 ildən 8 ilədək müddətə azadlıqdan məhrum etmə cəzası nəzərdə tutulur. Qeyd olunur ki, əvvəllər əmlakı müsadirə olunmaqla 5 ildən 10 ilədək cəza müddəti nəzərdə tutulurdu.