ABŞ Dövlət Departamenti Konqresə 8 milyard dollar məbləğində İsraillə təklif olunan razılaşma barədə "rəsmi olmayan" məlumat verib. Bu müqaviləyə qırıcı və zərbə helikopterləri üçün döyüş sursatları, eləcə də artilleriya mərmiləri daxildir.

"dogruxeber.tv" xəbər verir ki, bu barədə "Axios" məlumatlı mənbələrə istinadən yazıb.

Nəşr qeyd edir ki, bu, ABŞ prezidenti Co Bayden administrasiyası tərəfindən İsrailə təsdiqlənmiş son silah satışı olacaq.

Saziş, İsrailin baş naziri Benyamin Netanyahu və onun tərəfdarlarının Baydenin İsrailə "səssiz silah embarqosu" tətbiq etməsi ilə bağlı bəyanatları fonunda müzakirə olunur.

Bəzi demokratlar administrasiyanın İsrailə silah satışını hərbi əməliyyatların aparılma tərzi və Qəzzadakı humanitar vəziyyətin həlli ilə əlaqələndirməyə çalışsalar da, Bayden buna qarşı çıxıb.

Mənbələrin sözlərinə görə, bu razılaşma uzunmüddətli xarakter daşıyır. ABŞ-da olan ehtiyatların bir hissəsi ilə sursatların istehsalı və tədarükü mümkün olsa da, onların əksəriyyəti üçün bir il və ya daha çox müddət tələb olunur.

Razılaşmaya daxil olan silahlar:

•AIM-120C-8 AMRAAM tipli "hava-hava" raketləri (hava hücumları, o cümlədən pilotsuz uçuş aparatı təhlükələrinə qarşı qorunma üçün);
•artilleriya mərmiləri;
•Hellfire AGM-114 raketləri (zərbə helikopterləri üçün);
•kiçik ölçülü idarəolunan aviasiya bombaları, JDAM dəstləri (idarə olunmayan bombaları dəqiq bombalara çevirmək üçün), 500 funtluq döyüş başlıqları və bombalar üçün detonatorlar.

Müqavilə ilə tanış olan mənbənin sözlərinə görə, Dövlət Departamenti Konqresə bu razılaşmanın İsrailin uzunmüddətli təhlükəsizliyini dəstəkləməyi və vacib döyüş sursatlarının və hava hücumundan müdafiə vasitələrinin ehtiyatlarını artırmağı hədəflədiyini bildirib.

ABŞ rəsmisinin sitatı:

"Prezident açıq şəkildə bildirib ki, İsrail beynəlxalq hüquqa və humanitar hüquqa uyğun olaraq vətəndaşlarını qorumaq və İran və onun kuklalarının təcavüzünü cilovlamaq hüququna malikdir. Biz İsraili qorumaq üçün lazım olan imkanları təmin etməyə davam edəcəyik".

Payızda ABŞ İsrailə bildirmişdi ki, Qəzzadakı humanitar vəziyyəti yaxşılaşdırmaq üçün növbəti ay ərzində tədbirlər görməli və ya Amerika hərbi yardımına mümkün məhdudiyyətlərlə üzləşə bilər. Bu barədə ABŞ rəsmiləri məlumat vermişdi.