Şamaxı şəhərində qayınatasını öldürməkdə təqsirləndirilən şəxsin barəsində olan cinayət işi üzrə məhkəmə istintaqı başa çatıb.

DogruXeber.tv-nın məlumatına görə, Sumqayıt Ağır Cinayətlər Məhkəməsində qəsdən adam öldürməkdə ittiham olunan Teymur Əliyevə hökm oxunub, o, 9 il müddətinə azadlıqdan məhrum edilib.

İttihama görə, hadisə ötən il Şamaxı şəhəri, Şah İsmayıl Xətai küçəsi ev 53 ünvanında baş verib. T.Əliyev 2019-cu ildə ailə həyatı qurub və birgə nikahdan üç övladı dünyaya gəlib. Bir müddət Daxili İşlər Nazirliyinin Baş Mühafizə İdarəsinin Şamaxı Regional Şöbəsində polis nəfəri işləyən T.Əliyev 2024-cü ildə fəaliyyətində yol verdiyi nöqsanlara görə işdən azad edilib. Bundan sonra özünə iş tapa bilmədiyi üçün onun ailəsində narazılıqlar yaranıb. 2025-ci ildə Teymurun həyat yoldaşı küsərək uşaqlarını da götürüb atasının evinə gedib. T.Əliyev dəfələrlə barışmağa cəhd etsə də qayınatası Elşən Quliyev buna etirazını bildirib və ondan qızından boşanmasını istəyib.

Hadisə günü isə Teymur Əliyev küçədə hərəkət edərkən azyaşlı uşağı onu görüb və qucağına gəlib. Həmin vaxt küçədə sərxoş vəziyyətdə olan Elşən Əliyev Teymuru söyərək ondan uşağı buraxmasını istəyib. T.Əliyev isə uşağı götürərək öz evinə gəlib. Bir müddətdən sonra Elşən Quliyev onun yaşadığı küçəyə gələrək yenidən Teymuru söyməyə başlayıb. Teymur bu zaman evdən götürdüyü bıçaqla ona iki zərbə endirərək qətlə yetirib.

T.Əliyev könüllü şəkildə polisə təslim olub.\\oxu.az