ABŞ İsrail və Livan arasında atəşkəs sazişinin müddətinin 18 fevral tarixinə qədər uzadıldığını açıqlayıb.

"dogruxeber.tv" xəbər verir ki, bu barədə Ağ Evin bəyanatında qeyd olunur.

İsrail və Livanın "Hizbullah" terror qruplaşması arasında barışıq sazişi 27 noyabr 2024-cü il tarixində qüvvəyə minib.

Sazişə əsasən, "Hizbullah" 60 gün ərzində sərhədyanı əraziləri tərk etməli idi, eyni zamanda İsrail öz qoşunlarını Livan ərazilərindən çıxarmağı öhdəsinə götürüb.

"Ağ Evin verdiyi məlumata görə, ABŞ-ın müşahidəsi ilə tətbiq olunan Livan və İsrail arasında razılaşma 18 fevral 2025-ci il tarixinə qədər qüvvədə qalacaq".

Bəyanatda, həmçinin, Livan, İsrail və ABŞ hökumətlərinin 7 oktyabr 2023-cü ildən sonra əsir götürülmüş livanlıların geri qaytarılması ilə bağlı danışıqlara başlayacağı qeyd olunub.

"Hizbullah" və İsrail arasında baş verən münaqişə eyni zamanda Qəzza bölgəsindəki müharibə ilə paralel şəkildə davam edib və genişmiqyaslı İsrail hücumları zamanı öz zirvəsinə çatıb. Hücumlar nəticəsində İranın dəstəklədiyi bu qruplaşma əhəmiyyətli dərəcədə zəiflədilib.

15 yanvar tarixində isə ABŞ HƏMAS terrorçuları ilə İsrail arasında atəşkəs və girovların azad edilməsi barədə razılığa gəlindiyini elan edib.

O dövrdə ABŞ prezidenti Co Bayden bildirmişdi ki, bu razılaşma "Qəzzadakı hərbi əməliyyatları dayandırmağa, fələstinli mülki əhaliyə vacib humanitar yardımın həcmini artırmağa və girovların 15 aydan artıq müddətdən sonra ailələri ilə birləşməsinə imkan yaradacaq".

Hazırkı ABŞ prezidenti Donald Tramp isə qeyd edib ki, onun 2024-cü ilin noyabrında qazandığı qələbə olmasaydı, bu razılaşma mümkün olmazdı.