Tayvan hakimiyyəti kənd təsərrüfatı sahələrinə ciddi ziyan vuran yaşıl iquanların sayını azaltmaq üçün 120 min sürünəni məhv etməyi planlaşdırır.

"dogruxeber.tv" xəbər verir ki, bu barədə "Associated Press" (AP) məlumat yayıb.

Yaşıl iquanlar mərkəzi Amerika və Karib hövzəsində yayılmış sürünənlərdir. Onlar Tayvana ekzotik ev heyvanları kimi gətirilib. Lakin bu sürünənləri ev şəraitində saxlamaq çətin olub, çünki onlar 2 metrə qədər böyüyə, 20 kiloqrama qədər çəkiyə çata və 20 ilə qədər ömür sürə bilirlər.

Təbiətə buraxılan iquanlar sürətlə çoxalıb və hazırda onların populyasiyası 200 minə çatır. Tayvanda bu sürünənlərin təbii düşmənlərinin olmaması kənd təsərrüfatı ərazilərində onların geniş yayılmasına və əkinləri yeməsinə şərait yaradıb.

Tayvanın meşə təsərrüfatı və təbiəti mühafizə agentliyinin məlumatına görə, 2024-cü ildə ovçuluq qrupları təxminən 70 min iquanı məhv edib. Lakin yaşıl iquanlar bir dəfə yumurtlayanda 80-ə qədər yumurta qoya bilirlər ki, bu da onların populyasiyasını tez bərpa etməyə imkan verir.

Hakimiyyət orqanları əhalidən iquan yuvalarının aşkar edilməsinə kömək etməyi xahiş edib. Onlar heyvanların məhv edilməsi üçün ən humanist üsul kimi balıqçılıq mizraqlarından istifadəni tövsiyə edirlər.

Bundan əvvəl alimlər Afrika adalarından birində yırtıcı siçanların məhv edilməsi üçün adanın zəhərlənməsini təklif etmişdilər. Bu siçanlar yerli quş növlərini yeyərək onların populyasiyasına ciddi təhlükə yaradırdı.