ABŞ Hərbi Hava Qüvvələrinə məxsus təyyarələrin Nevada səhrasındakı sirrlərlə dolu 51-ci bölgəyə etdiyi gizli uçuşlar yeni iddiaları gündəmə gətirib.

"dogruxeber.tv"ın məlumatına görə, çərşənbə gününə aid uçuş izləmə məlumatları göstərir ki, ABŞ Hərbi Hava Qüvvələrinə məxsus üç reys Nevada səhrasında yerləşən gizli 51-ci bölgəyə həyata keçirilib. Bu təyyarələr Müdafiə Nazirliyinin əməkdaşlarını, müqaviləli işçiləri və hərbi heyəti daşıyan ordunun yüksək məxfi sərnişin təyyarələri olan "Janet" donanmasına aiddir.

"Janet" təyyarələrinin hər üçü Las Veqas şəhərindəki "Harry Reid" beynəlxalq hava limanından havaya qalxıb. İlk uçuş "Janet 33" saat 07:09-da start götürüb və 07:24-də eniş edib. "Janet 32" saat 09:38-də havalanıb və 09:56-da yerə enib. Sonuncu reys olan "Janet 46" isə saat 14:11-də havalanaraq 18 dəqiqə sonra eyni bölgəyə eniş edib. Qeyd edək ki, "Janet" donanmasına altı ədəd "Boeing 737" tipli təyyarə daxildir.

51-ci bölgə ABŞ Hərbi Hava Qüvvələrinin Nevada Sınaq və Təlim Sahəsində (NTTR) yerləşir və düşmüş kosmik aparatların, dünya xarici texnologiyaların saxlandığı iddiaları ilə tanınır. "Janet" təyyarələri Las Veqas hava limanındakı xüsusi terminaldan qalxaraq 51-ci bölgəyə personal daşıyır. "FlightAware" platforması üç reysin də 51-ci bölgəyə bənzər marşrut izlədiyini təsdiqləyib. "ADS-B Exchange" isə 20 fevraldan bəri Las Veqasdan 51-ci bölgəyə uçan ən azı 18 "Janet" təyyarəsini qeydə alıb.

Bu bölgə məxfi təyyarə və silah sistemlərinin sınaqdan keçirilməsi və hazırlanması ilə tanınır. Soyuq müharibə dövründə Sovet İttifaqına qarşı kəşfiyyat məlumatı toplamaq üçün istifadə edilən "U-2" casus təyyarəsi məhz burada sınaqdan keçirilib. Hazırda isə Meksika narkokartelləri və digər təhlükələrin izlənməsi məqsədilə istifadə olunur.

Məxfi "Janet" donanması 1972-ci ildə fəaliyyətə başlayıb və 1955-ci ildə yaradılmış 51-ci bölgəyə ilk uçuşunu həyata keçirib. Bu bölgədə "Janet" təyyarələrinin eniş edə biləcəyi altı uçuş zolağı mövcuddur və 12 min metr uzunluğundakı nəhəng pisti ilə seçilir.

51-ci bölgənin məxfi xarakteri illər ərzində çoxsaylı əfsanələrin yaranmasına səbəb olub. Lakin yayılan iddialara görə, burada aparılan bəzi gizli işlərin azı bir hissəsinin cari il ərzində açıqlanacağı gözlənilir.

Qeyd edək ki, ABŞ-ın keçmiş prezidenti Bill Klinton dövlət sirrlərinin avtomatik şəkildə açıqlanması üçün 25 illik müddət müəyyən edən sərəncam imzalamışdı. Bu da o deməkdir ki, 1990-cı illərdən qalma bir sıra yüksək səviyyəli məxfi layihələrin yaxın zamanda ictimaiyyətə təqdim olunması mümkündür.

Söyləntilərə əsasən, 51-ci bölgədə əksər insanların xəyal belə edə bilməyəcəyi texnologiyalar mövcuddur.