Bu yaxınlarda rəhbərliyi töhmət alan və bəzi əməkdaşlarının Azərbaycana qarşı fəaliyyət göstərən “Transperency İnternational” təşkilatı ilə gizli əlaqələri üzə çıxan Dövlət Turizm Agentliyi milyonluq tenderinin nəticəsini açıqlayıb.

"dogruxeber.tv" Tribunainfo.az-a istinadən xəbər verir ki, bu barədə açıq mənbələrdə məlumat yayılıb.

Bildirilir ki, Dövlət Turizm Agentliyi Qusar rayonunun Ləzə kəndində turizm infrastrukturunun yaradılmasını reallaşdıracaq. Bunun üçün 1 milyon 2 min 938 manat xərc çəkəcəklər. Tenderin qalibi isə “CONSTRUCTION BUSINESS GROUP” MMC olub.

Tribunainfo.az bununla bağlı kiçik bir araşdırma aparıb. Bu zaman məlum olub ki, sözügedən şirkət ötən il də Turizm Agentliyinin tenderini udub. Belə ki, həmin tenderlə “CONSTRUCTION BUSINESS GROUP” MMC İsmayıllı rayonu, Lahıc qəsəbəsi, “Lahıc” Dövlət Tarix-Mədəniyyət Qoruğunun inzibati binası və avtomobil dayanacağının tikintisini həyata keçirib. Bunun müqabilində isə 583 min 416 manat pul alıb.

Nəzərinizə çatdıraq ki, “CONSTRUCTION BUSINESS GROUP” MMC-nin nizamnamə kapitalı 1120 manat təşkil edir. Şirkətin qanuni təmsilçisi Elmir Vaqif oğlu Babayevdir.

Xatırladaq ki, bu şirkətin ötən il ərzində qalib olduğu tenderlərlə bağlı maraqlı araşdırmamızı yaxın günlərdə təqdim edəcəyik. Qarşı tərəfi də dinləməyə hazırıq.