Tokio Universitetinin alimləri ənənəvi fermalara ehtiyac duymadan, real toyuq əzələ toxumasını və lifli quruluşunu təqlid edən laboratoriya mənşəli toyuq əti hazırlayıblar. Bu inqilabi texnologiya həm qida sənayesinə, həm də səhiyyə sahəsinə dərin təsir göstərə bilər.

"dogruxeber.tv" xəbər verir ki, Tokio Universitetindən tədqiqatçılar davamlı qida texnologiyasında mühüm bir addım ataraq indiyədək yaradılanlar arasında ən realist laboratoriya toyuq əti nümunəsini təqdim ediblər. Yeni texnologiya yalnız dad baxımından deyil, həm də struktur baxımından real toyuq əzələsini uğurla təqlid edərək böyük marağa səbəb olub.

Bu uğura yüksək texnologiyalı bioreaktor sistemi vasitəsilə, ənənəvi toyuqçuluğa və klassik istehsal üsullarına ehtiyac olmadan nail olunub. Yeni üsulla 10 qramdan çox gerçəyə bənzər toyuq əti əldə edilib.

Laboratoriyada ət istehsalında əsas çətinliklərdən biri yalnız doğranmış toxuma deyil, bütöv toyuq filesinə bənzəyən qalın və lifli toxumaların yaradılmasıdır. Canlı orqanizmlərdə oksigen və qida maddələrini daşıyan mürəkkəb damar sisteminin olmaması, laboratoriya şəraitində toxumaların bir neçə millimetrdən qalın inkişaf etməsini çətinləşdirir və real toyuq toxumasının əldə olunmasına əngəl yaradır.

Tokio Universitetinin araşdırma qrupu bu problemi "boş lifli bioreaktor" adlandırdıqları yenilikçi texnologiya ilə aradan qaldırıb. Bu sistem dializ aparatlarından ilham alınaraq hazırlanıb və içi boş olan 1.100-dən çox incə lif vasitəsilə toxumalara oksigen və qida maddələri ötürərək təbii qan damarlarının funksiyasını yerinə yetirir. Bu, toxumaların daha qalın, canlı və real struktur almasına imkan verir.

Araşdırmaçılar eyni zamanda fibroblast hüceyrələrindən istifadə edərək yaradılan toxumanın birləşdirici quruluşunu da gücləndiriblər. Nəticədə laboratoriyada əldə edilən toyuq əti, ənənəvi toyuq filesinin lifli və şirəli quruluşuna olduqca yaxın bir toxuma qazanıb. Bu yanaşma, süni ət istehsalında tez-tez rast gəlinən "lapa" quruluşu problemini də aradan qaldıraraq real toyuq təcrübəsinə daha da yaxınlaşma imkanı yaradıb.

Bu mühüm yenilik yalnız qida sənayesi üçün deyil, eyni zamanda ətraf mühitin qorunması, heyvan hüquqları və zoonotik xəstəliklərin qarşısının alınması baxımından da böyük əhəmiyyət daşıyır. Laboratoriya şəraitində hazırlanan toyuq əti, quşçuluq təsərrüfatlarının yaratdığı ekoloji yükü azalda, heyvan rifahına dair etik narahatlıqları aradan qaldıra və quş qripi kimi xəstəliklərin insanlara keçmə riskini minimuma endirə bilər. Bundan əlavə, texnologiya regenerativ tibb, dərman testləri və əzələ toxumasından istifadə edən yumşaq robotların inkişafı kimi sahələrdə də tətbiq oluna bilər.

Lakin hər böyük texnoloji sıçrayışda olduğu kimi, bu istiqamətdə də bəzi problemlər qalır. Onlar arasında oksigenin daha optimal ötürülməsi, böyümə mərhələsində istifadə olunan liflərin avtomatik şəkildə çıxarılması və tam yeyilə bilən materialların texnologiyaya inteqrasiyası məsələləri var. Tədqiqat qrupu bu problemlərin həlli üzərində işini davam etdirir.

İndiyədək əldə edilən nəticələr göstərir ki, yüksək keyfiyyətli laboratoriya mənşəli toyuq artıq elmi fantastika deyil, real həyatda tətbiq oluna biləcək alternativə çevrilməkdədir.