ABŞ Mərkəzi Bankı (FED) gözləntilərə uyğun olaraq uçot dərəcəsini 4,25–4,50 faiz aralığında sabit saxlayıb. Son dörd iclasda dəyişiklik etməyən FED bu il üçün iki faiz endirimi planını qüvvədə saxlayıb. Lakin 2025-ci il üzrə iqtisadi artımın zəifləyəcəyi, inflyasiyanın isə arta biləcəyi ehtimalı ön plana çıxarılıb. Bildirilir ki, bu qərarlar qlobal bazarlarda qeyri-müəyyənliyi artırır.

FED-in faiz qərarını sabit saxlaması və inflyasiya proqnozlarını yüksəltməsi manat, neft gəlirləri və ümumi makroiqtisadi sabitlik üçün nə vəd edir?

"dogruxeber.tv" Pravda.az-a istinadən xəbər verir ki, Globalinfo.az-a danışan iqtisadçı Eldəniz Əmirov deyib ki, FED-in qərarları qlobal iqtisadiyyata müxtəlif istiqamətlərdə ciddi təsir göstərir:

“Ölkə iqtisadiyyatı nə qədər liberal və qlobal iqtisadiyyata inteqrasiya olunubsa, ABŞ-ın uçot dərəcəsindəki dəyişikliklər, yəni artım və ya azalma da daha güclü təsir edir. Uçot dərəcəsinin sabit saxlanılması isə bunu minimuma endirir. Bu qərarı iqtisadi proseslərin öz axarı ilə davam etməsinə şərait yaratmaq kimi dəyərləndirmək olar. Başqa sözlə, faiz dərəcəsinin dəyişməməsi iqtisadi sabitliyi qorumaq üçün atılmış müvəqqəti addımdır. Bu isə həmin qərarın ölkə iqtisadiyyatlarına təsirini xeyli zəiflədir. Bu baxımdan, hazırkı şəraitdə faiz dərəcəsinin dəyişməməsi Azərbaycan iqtisadiyyatına xüsusi müsbət təsir göstərməyəcək”.

İqtisadçı bildirib ki, uçot dərəcəsindəki dəyişikliklər zaman-zaman müəyyən multiplikativ effektlər yaradır:

“Ancaq bu dəfə belə bir dəyişiklik baş vermədiyi üçün qərarın nə ölkə iqtisadiyyatına, nə də Azərbaycanda mövcud olan makroiqtisadi tarazlığa ciddi mənfi təsiri gözlənilmir”.