dogruxeber.tv: - AFFA-nın mətbuat xidmətində naməlum küləklər əsir. Zatən orası çox havasız gəlirdi mənə. Hərdən az qalırdım ki, gedib o otağın qapı-pəncərəsini açım, havası dəyişsin, nəfəs alaq.

Mia.az-a daxil olan məlumata görə, yaxın vaxtlarda məlum qurumun mətbuat xidmətinin rəhbərini dəyişəcəklər. Hazırda bu vəzifədə 2023-cü ildən bəri Elnur Məmmədli oturub.

E.Məmmədli jurnalistdi, həmkarımızdı. Düzdü, arada cığallıq edir, həmkarlarına ayrı-seçkilik qoyur.

Məsələn, millinin Qəbələdəki oyununa keçən il məni buraxmadı. Halbuki, getmək üçün yazmışdım ona. Millinin oyunlarından sonra baş məşqçiyə sual verməyə imkan vermir mənə, əlimi qaldırıram sual üçün, özünü görməməzliyə vurur, ya da sözümü kəsir. AFFA-nın hesabat yığıncağında əlim göydə qaldı, mənə icazə vermədi ki, sual verim. Axırda Rövşən Nəcəfə özüm yaxınlaşdım.

Xırdaçılıq eləyib hər hərəkətini üzünə vurmaq istəmirəm, həmkarımdı, çünki. İndi də şikayətlənmirəm. Deyəcəksiniz ki, vəzifədən gedir deyə, dalıyca danışırsan. Əsla. Allah elə eləsin, xəbər doğru çıxmasın. Sadəcə, söz sözü gətirdi, deyə yazıram bunları. Həm də Elnur Məmmədli kimi adamlar bir az boz rənğdə görünür gözümə adətən. Vaxt sərf eləmək istəmirəm.

Bəs onun yerinə kimi qoyacaqlar? Bax, burada daha rənğli bir adamın adı var.

Deyilənə görə, AFFA-nın mətbuat xidməti postuna Seymur Teymurovu təyin edəcəklər. O da jurnalistdimi? Yox. Tarixçidi, amma illərdi intellektual oyunların içindədi, idarəçiliyi sınaqdan keçirib və AFFA-ya təzəlikcə baş katib təyin olunan Cahangir Fərəcullayevlə eyni mətbəxin adamıdı. Jurnalist olmasa da, medianın yanında davamlı yeri olub.

S.Teymurov “Xəzər” İntellektual Gənclər Klubu” İctimai Birliyinin sədridi. Ölkəmizdə ilk dəfə ana dilində intellektual yarışları təşkil edib. GameTV.az prodüser mərkəzinin çəkdiyi "Что? Где? Когда?" verilişinin azərbaycandilli versiyasında ilk komandanın kapitanı olub. 2012-ci ilədək "Что? Где? Когда?" Elitar Klubunda çıxış edib. Yeri gəlmişkən, Cahangir Fərəcullayevlə yolları da bu illərdə kəsişib.

Bəs media, jurnalistika ilə nə əlaqə?

S.Teymurov 2017-ci ildən Media Çalışmaları MMC-nin baş direktorudu. Bu MMC-yə “Bax.tv” video portalı, “News.az” xəbər saytı, “Offsideplus.az” idman saytı daxildi.

2016–2017-ci illərdə həm “Qarant” Media Holdinqin İdarə Heyətinin sədri olub, həm də “Oxu.az” xəbər saytına baş redaktorluq edib. 2016-da isə radioda özünü sınaqdan keçirib: 107.7 dalğasında “AvtoFM” radiostansiyasının direktoru olub. Yolu “Biznesinfo.az” saytından, “ANS TV”-dən keçib. Hələ bir ara müəllimlik edib.

Siyahı gördüyünüz kimi, uzundu. Bu siyahıda ən vacib məlumat isə hazırda S.Teymurovun "Azərlotereya" ASC-nin İctimaiyyətlə əlaqələr və korporativ sosial məsuliyyət üzrə rəhbəri olmasıdı ki, bu da onun C.Fərəcullayevin işlədiyi binaya köçəcəyi xəbərinin səbəbini bizə aydın edir.

Media adamı olmayan C.Fərəcullayevin bu sahədə peşəkara ehtiyacı olduğunu anlayırsan. AFFA-nın mətbuat xidmətində də yaxını yoxdu. Media kimi qalmaqallı sahədən bəs necə baş çıxarsın? S.Teymurovun təyinatı məhz bu səbəbdən çox faydalı olacaq Fərəcullayevə. Onsuz da axır vaxtlarda tədbirlərdə də bir yerdəydilər.
Nə deyim?