Gündəlik şəxsi qulluq vasitələri arasında deodorantlar xüsusi yer tutur. Yay aylarında daha da aktuallaşan bu mövzu ilə bağlı son illərdə təbii məhsullara maraq artmaqdadır. Tərkibində alüminium, paraben və süni ətirlər olmayan təbii deodorantlar həm dəriyə zərər vermir, həm də uzunmüddətli istifadədə əlavə problemlərin qarşısını alır. Amma tər qoxusunun əsl səbəbi çox zaman düzgün anlaşılmır.

Tər vəziləri iki əsas növdə olur: ekkrin və apokrin. Ekkrin vəziləri bədənin hər yerində yerləşir və əsas funksiyası bədən istiliyini tənzimləməkdir. Bu vəzilərin ifraz etdiyi maye demək olar ki, tamamilə şəffaf və qoxusuzdur. Apokrin vəziləri isə əsasən qoltuq altı, qasıq və döş ətrafında yerləşir və daha yağlı bir maye ifraz edir. Qoxunun əsas mənbəyi bu mayenin dəridəki bakteriyalarla qarşılıqlı reaksiyası nəticəsində yaranır.

Tər əslində qoxusuzdur. Pis qoxu bədənin mikrobiom tarazlığının pozulması və gigiyena qaydalarına tam əməl olunmaması nəticəsində meydana çıxır. Sintetik tərkibli deodorantlar çox zaman bu bakteriyaları tamamilə məhv etməyə çalışır və nəticədə dəridə qoruyucu mikrofloranın pozulmasına səbəb olur. Bu da uzunmüddətli istifadədə daha kəskin qoxulara yol aça bilər.

Təbii deodorantlar bu baxımdan balansı qoruyur. Onların tərkibində soda, kokos yağı, shea yağı, arı mumu, nişasta və efir yağları kimi komponentlər olur. Bu maddələr həm bakteriyaların artmasının qarşısını alır, həm də dərinin nəfəs almasına imkan verir. Təbii deodorantlar bədəni tərləməkdən deyil, qoxunun yaranmasından qoruyur. Onların təsiri bir qədər zəif ola bilər, lakin sağlamlıq baxımından daha etibarlıdır.

“dogruxeber.tv” tərəfindən aparılan müşahidələr göstərir ki, təbii məhsullara keçid edən bir çox istifadəçi ilk günlərdə təsirin az olduğunu hiss etsə də, bir neçə həftəlik uyğunlaşma dövründən sonra dəri özü-özünü tənzimləməyə başlayır. Bu zaman həm qoxu azalır, həm də dəridə qıcıqlanma və qaralmaların qarşısı alınır.

Tər qoxusunun qarşısını almaq üçün yalnız deodorantlardan istifadə yetərli deyil. Pambıq və nəfəs alan parçalı geyimlər, su balansına diqqət, düzgün qidalanma və şəxsi gigiyena bu prosesdə birbaşa rol oynayır.

“dogruxeber.tv” qeyd edir ki, sintetik geyimlər və ədviyyatlı yeməklər də tər qoxusunun güclənməsinə səbəb ola bilər.