Son illərdə uşaqlar arasında tez-tez xəstələnmə, allergik reaksiyalar və ümumi immun zəifliyi halları ciddi şəkildə artıb. Həm valideynlər, həm də pediatrlar bu problemlə mübarizə yollarını axtararkən tez-tez kimyəvi dərman preparatlarına müraciət edirlər. Lakin bəzi ailələr alternativ çıxış yolu kimi təbii üsullara – xalq təbabəti vasitələrinə yönəlməyə başlayıb.

“dogruxeber.tv” yazır ki, xüsusilə immun sisteminin möhkəmləndirilməsi məqsədilə bal, qara zirə, itburnu, sarımsaq, zəncəfil və propolis kimi məhsullara maraq xeyli artıb.

Bu təbii vasitələr qədimdən bəri xəstəliklərin qarşısını almaqda və orqanizmin müqavimətini artırmaqda istifadə olunub. Xalq təbabətində uşaqlar üçün hazırlanmış immun gücləndirici reseptlər nəsildən-nəslə ötürülüb.

“dogruxeber.tv” redaksiyasına danışan bəzi həkim və təbii müalicə mütəxəssisləri qeyd edir ki, xüsusilə mövsüm dəyişikliklərində qara zirə yağı, çobanyastığı çayı, təbii bal və limonla hazırlanmış qarışıqlar həm preventiv, həm də dəstəkləyici rol oynaya bilər. Bu vasitələr təkcə immunitetə yox, həm də həzm sisteminə, yuxu rejiminə və ümumi enerji balansına da müsbət təsir göstərir.

Lakin bu sahədə də maarifləndirici yanaşma olduqca vacibdir. Təbii vasitələr düzgün dozada, yaş uyğunluğuna görə və ehtiyac əsasında istifadə olunmalıdır. Valideynlərin “nə qədər çox olsa, o qədər yaxşıdır” yanaşması bəzi hallarda əks nəticə verə bilər. Allergik fonu olan uşaqlarda bal və ya bəzi bitkilər ağır reaksiya yarada bilər. Digər tərəfdən, xalq təbabəti mütləq həkim nəzarətində və müasir tibbi yanaşma ilə paralel şəkildə tətbiq edilməlidir. Təbii üsulların dərmanı əvəz etmədiyi, sadəcə dəstək rolu oynadığı unudulmamalıdır.

Bu gün daha çox uşaq bağçalarında, məktəblərdə və evlərdə təbii immun dəstəkləyicilərinə marağın artması bir tərəfdən təqdirəlayiqdir. Lakin burada məqsəd yalnız populyarlaşmaq deyil, elmi əsaslı, balanslı və təhlükəsiz yanaşma ilə sağlam böyümə mühitini təmin etmək olmalıdır. Uşaqların immuniteti yalnız dərmanla deyil, düzgün qidalanma, aktiv həyat tərzi, təmiz hava və emosional tarazlıqla da qorunmalıdır.