Son illərdə insanların mənəvi axtarışları və daxili sakitlik istəyi artdıqca, spirituallıq sahəsinə yönələn maraq da paralel şəkildə böyüyüb. Lakin təəssüf ki, bu sahədə yaranan boşluqdan istifadə edən bir çox "enerji mütəxəssisi", "mənəvi bələdçi" və "təmizləyici"lər ortaya çıxaraq həqiqi spirituallığı ticari alətə çeviriblər. “DogruXeber.tv” olaraq apardığımız müşahidələr göstərir ki, bəzi insanlar sadəcə ad qoyulmamış duyğusal boşluqları və psixoloji zəiflikləri suistifadə edərək, insanlara “təmizləmə”, “blok açma”, “negativ enerjini çıxarma” adı altında sadəcə illüziya təqdim edirlər.

Belə manipulyativ yanaşmalarda əsas hədəf — özünü çıxılmaz vəziyyətdə görən, daxili cavablar axtaran insanlardır. Onlara təqdim olunan “seanslar”, “aura təmizləmələri” və ya “keçmiş həyat bağlantıları” çox zaman elmi və ya mənəvi əsaslardan tamamilə uzaq, sadəcə inandırıcı danışıq və atmosfer üzərində qurulan bir psixoloji təsir mexanizmi olur. İnsan bir dəfə “energetik problem” anlayışına inandıqdan sonra, bu problemin aradan qalxması üçün daimi olaraq həmin şəxslərə müraciət etməyə başlayır. Nəticədə isə müalicə deyil, psixoloji asılılıq yaranır.

“DogruXeber.tv” yazır ki, bu kimi manipulyasiyaların əsas təhlükəsi insanın özünə olan inamını tədricən əlindən almasıdır. Artıq bir çox insan öz qərarlarını belə vermək üçün "enerji yoxlatdırır", "blokları açdırır", "ritual etdirir". Halbuki bu proseslər bir nöqtədən sonra təkcə maddi deyil, həm də mənəvi tükənmişlik yaradır. İnsan özü ilə əlaqəsini itirir, öz intuisiyasına yox, “şəfaçı”ya etibar etməyə başlayır.

Bütün bu proseslərin kökündə isə qeyri-sağlam münasibətlər və yönəldilmiş qorxu durur. “Əgər bu mərasimə gəlməsən, həyatında pisliklər baş verəcək”, “Auran bulanıbdır, ona görə uğursuzluq yaşayırsan” kimi cümlələrlə insanlar qorxudulur, bir növ energetik və mənəvi şantaja məruz qalırlar.

Bütün bunlar göstərir ki, spirituallıq — insanın öz iç səsini eşitməsidir, başqasının sözlərinə və seanslarına tabe olmaq deyil. Gerçək mənəvilik səssiz, sadə və kənardan təsdiqə ehtiyac duymayan bir prosesdir. Saxta enerjilər və süni ritualar isə sadəcə yuxarıdan baxan, yönləndirən və asılılıq yaradan manipulyasiyalardır.